Նելլի Դանիելյան, Sputnik.
Ավելի քան 3 դար կանգուն մնացած Կարմիր կամրջի գոյությանը վտանգ է սպառնում: Պատմական կամուրջը փրկելու գումար ՀՀ կառավարությունը չունի:
Դարեր առաջ Երևանի բերդն անառիկ ամրոց էր, դեպի ուր տանող միակ ճանապարհն անցնում էր Հրազդանի կիրճով: Ամրոցի (այժմյան Արարատ գինու կոմբինատ) հետ կապող երեք պատմական կամուրջներից մեզ է հասել միայն մեկը՝ Կարմիր կամուրջը:
Այն կառուցվել է 1679 թ.-ին, երկրաշարժից ավերված կամրջի տեղում, մեծահարուստ հայ վաճառական Խոջա Փլավի (Փիլավ) ջանքերով: Ժողովուրդն այն Կարմիր է կոչել կարմիր տուֆից կառուցված լինելու համար, կամ Խոջա Փլավի կամուրջ՝ ի պատիվ դրա ֆինանսավորումն ապահոված հայ մեծահարուստի:
Կամրջի երկարությունը կազմում է 87,5 մ, երկու կողմերի բազրիքների միջև ընկած լայնությունը` 6,47 մ, բարձրությունը՝ 11 մ: Ունի չորս կամարային բացվածքներ:
1830թ.-ին ռ-ուսական պետական մարմինները որոշ չափով բարեփոխումների են ենթարկել կամուրջը: Սա դարձել է կամրջի վերջին հիմնանորոգումը:
Այսօր Կարմիր կամուրջը կիսով չափ ավերված է: Տարիներ առաջ կամրջի մի կեսը քանդվեց, և այն դադարեց որպես կամուրջ ծառայել։
Խորհրդային տարիներին կամրջի վերանորոգման համար գումար էր հատկացվել, աշխատանքներն էլ սկսվել էին, բայց 1988-ից հետո աշխատանքները դադարեցվեցին, կամրջի նորոգումը հետաձգվեց, ու արդեն ՝ շուրջ 30 տարի:
ՀՀ մշակույթի նախարարության կատարած հաշվարկների համաձայն` այն վերանորոգելու համար 1 մլն դոլար է անհրաժեշտ: Հաշվարկները կան, գումարը` ոչ:
