ԵՐԵՎԱՆ, 5 նոյեմբերի — Sputnik. Նոյեմբերի 5-ի ՏԻՄ ընտրություններին հատկապես ակտիվ են միավորվող համայքները: Աննախադեպ ակտիվություն է Շիրակի Ախուրյան համայնքում: 8 գյուղ միավորող փնջային այս համայնքը ընտրացուցակով ունի 14 հազար ընտրող: Տեղում աշխատող Sputnik Արմենիայի թղթակիցը հաղորդում է, որ առավոտից ընտրողների մասնակցությունը բավական մեծ է: Մարդիկ խումբ-խումբ գալիս են ընտրատեղամասեր: Որոշ տեղամասերի նախագահներ նույնիսկ պնդում են, որ այս ընտրություններում ընտրողները գերաակտիվ են:
Համայնքի ղեկավարի համար պայքարող 6 և ավագանու 15 տեղի համար պայքարող 31 թեկնածուներն ակտիվ «գործում» էին բոլոր տեղամասերում: Ըստ մեր թղթակցի տվյալների՝ կուտակումներ կան գրեթե բոլոր տեղամասերի մուտքերի մոտ: Կանխվել է նաև կրկնակի տեղամաս մտնելու ընտրողի փորձը: Իսկ լրագրողներից ազատվելու փորձեր լինում են գրեթե բոլոր տեղամասերում:
«Որոշ տեղամասերում լրագրողների ուշադրությունը շեղելու համար թեկնածուների վստահված անձինք հյուրասիրություն էին առաջարկում: Հյուրասիրությունից հրաժարվող և ակտիվ աշխատող լրագրողները անմասն չմնացին հայհոյանքից»,-հաղորդում է Արմենուհի Մխոյանը:
Գյումրու վերջին ընտրությունների ժամանակ կիրառվող կարուսելը կիրառվում է նաև Ախուրյանում:
Որոշ տեղամասերում ոստիկանները ընտրախախտումներին ուշադրություն են դարձնում լրագրողների բարձրացրած աղմուկիւց հետո միայն:
