ԵՐԵՎԱՆ, 6 նոյեմբերի — Sputnik. Դեր Զորի քանդված եկեղեցին ևս կվերակառուցենք: Այս մասին հայտարարել է Մեծի Տանն Կիլիկիո Արամ Ա կաթողիկոսը՝ տեսնելով Դեր Զորի ազատագրումից հետո տեղի Սրբոց Նահատակաց եկեղեցու լուսանկարները։ Այս մասին հայտնում է «Գանձասարը»:
«Հուզմունքով, ցավով և ընդվզումով դիտեցի Դեր Զորի մեր եկեղեցու և համալիրի նկարները: Քանդված և ամայի… Դեր Զորը մեր ժողովրդի համար ցավի, տառապանքի և Ցեղասպանության հոմանիշ է: Դեր Զորը նաև մեր ժողովրդի վերածննդի խորհրդանիշն է: Պատմության ընթացքում մեր թշնամիները քանդել են, մենք՝ վերակառուցել: Քանդված Դեր Զորը ևս պիտի վերակառուցենք հավաքական հավատքով և հանձնառությամբ»,- ասել է Արամ Ա կաթողիկոսը:
2014-ի սեպտեմբերի 21-ին «Իսլամական պետություն» ահաբեկչական խմբավորման անդամները պայթեցրել էին եկեղեցին: Ահաբեկիչները եկեղեցին նախ ականապատել են, այնուհետև հեռակառավարվող սարք գործարկել:
Այդ օրերին ՀՀ արտգործնախարար Էդվարդ Նալբանդյանը հայտարարություն էր տարածել` խստորեն դատապարտելով Հայոց Ցեղասպանության զոհերի հիշատակին նվիրված, Մեծ Եղեռնի բազմաթիվ նահատակների մասունքներն ամփոփող եկեղեցու պայթեցումը։
Սրբոց Նահատակաց մատուռը կառուցվել է Դեր Զորի նախկին Սբ Հռիփսիմե եկեղեցու և Ազգային վարժարանի տեղում։ Հիմնարկեքը կատարվել է 1985-ի մայիսի 12-ին Մեծի Տանն Կիլիկիո Կաթողիկոս Գարեգին 2-րդի ձեռամբ: Շինարարական աշխատանքները ավարտվել են 1990-ի նոյեմբերին: Այն ամբողջանում է Սրբոց Նահատակաց հուշահամալիրով։ Սրբոց Նահատակաց մատուռի ներքնահարկում են գտնվում Խաչելության, Նահատակության և Եղեռնի սրահները։ Այստեղ ամփոփվում են նաև Դեր Զորի անապատներում մարտիրոսացած Մեծ եղեռնի զոհերի մասունքները։
