ԵՐԵՎԱՆ, 7 նոյեմբերի — Sputnik. «Արտադրված է Հայաստանում». սմարթֆոնների ու պլանշետների վրայի այս դաջվածքը ոգևորիչ էր հայերի, էկզոտիկ` արտասահմանցիների համար։ ArmTab-ն ու ArmPhone-ը մեծ բումով մուտք գործեցին հայկական շուկա նախորդ տարվա հունիսին, հետո այս թեմայի շուրջ աղմուկն ու հետաքրքրությունը մարեց։
ՀՀ ազգային վիճակագրական ծառայության տվյալով` 2017 թվականի հունվար-սեպտեմբեր ամիսներին արտադրվել է 55 պլանշետ։ Իսկ դա 96.5 տոկոսով պակաս է նախորդ տարվա ցուցանիշից։ 2016-ի նույն ժամանակահատվածում արտադրվել է 1 585 պլանշետ: Նույն ժամանակահատվածում Հայաստանում արտադրվել է 330 բջջային հեռախոս։ Այս թիվն էլ նախորդ տարվա նույն ժամանակահատվածի համեմատ նվազել է 68.4 տոկոսով: 2016 թվականին արտադրվել է 1 045 հատ բջջային հեռախոս:
ArmTab-ի ու ArmPhone-ի վաճառքի գրասենյակում ասում են` սխալ է հաշվարկել հունվարից սեպտեմբեր ժամանակահատվածը, քանի որ իրենք արտադրությունը սկսել են միայն հունիսին։ Սպասեք, դեռ թվերը կավելանան, հորդորում են այնտեղից։
«Անընդհատ զանգեր կան, հետաքրքրվում են, աշխուժություն կա։ Այս պահին նոր մոդելի հեռախոս է պատրաստվում։ Շատ մարդիկ կան, որ պատրաստ են հայկական հեռախոս գնել, նրանց համար սկզբունքային է, որ հեռախոսի վրա լինի` արտադրված է Հայաստանում»,- Sputnik Արմենիայի հետ զրույցում հայտնեցին վաճառքի գրասենյակից։
Տեղեկատվական անվտանգության փորձագետ Սամվել Մարտիրոսյանի խոսքով, հայկական արտադրության սմարթֆոնների ու պլանշետների մեծ վաճառք ակնկալել զուտ հայկականությունից ելնելով` միամտություն է։ Շուկայում կան խոշոր խաղացողներ, որոնց կողքին հայկականը մրցակցային չէր կարող լինել։
«Հայկական արտադրանքն աճ ունեցավ զուտ հայկական բրենդինգի վրա, այնպես չէ, որ գնային ու որակական առումով շահեկան էր։ Կամ պետք է լավ մարքեթինգ անել ու վաճառել ավելի թանկ ապրանք, կամ պետք է էժան ապրանք տալ։ Մեզ մոտ կարող են բրենդինգ անել սփյուռքի համար, բայց այդ շուկան էլ արագ կհագենա, ինչը հիմա տեսնում ենք»,- ասաց Մարտիրոսյանը։
Նրա խոսքով` Հայաստանում կա 15-16 հազար ՏՏ աշխատող։ Այս ներուժով չի կարելի խոսել տեխնոլոգիական Հայաստանի մասին։
«Միֆ եմ համարում, որ կարող ենք սմարթֆոնների ու պլանշետների արտադրության մեջ հաջողություն ունենալ»,-ասաց նա։
Մարտիրոսյանը կարծում է, որ Հայաստանին պետք էլ չէ այս հարցում մրցակցել լուրջ արտադրողների հետ։ Նա հիշեցնում է ժողովրդական հայտնի խոսքը` ոտքը պետք է վերմակին համապատասխան մեկնել։
