ԵՐԵՎԱՆ, 8 նոյեմբերի–Sputnik. Ուսանողների մի խումբ դասադուլ հայտարարելիս սեփական շահերն է առաջ տանում, այդ համոզմունքն ունի Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը։
Նրա խոսքով` «Զինվորական ծառայության և զինծառայողի կարգավիճակի մասին օրենքը» լայն հնարավորություններ է տալիս երիտասարդներին, այսինքն` նա կարող է զբաղվել գիտելիքով անգամ ծառայելիս։
«Ուսանողների խումբ կա, որ անձնական խնդիր է լուծում, չեմ կարծում, որ դրանք մեծ դեր ունեն մեր բարեփոխումների մեջ։ Եթե սա բանակից խուսափելու շարժում չէ, ուրեմն այն հնարավորությունները, որոնք արդեն կան օրենքում կրթությունը շարունակական դարձնելու համար, ամբողջությամբ փարատում են բոլոր մտահոգությունները»,– ասաց նա։
Կարեն Ավագյանը հայտնեց, որ բանակում ծառայողները որևէ կերպ չեն կտրվում ուսման պրոցեսից, եթե ցանկանում են։ Նա օրինակներ բերեց` ապրիլյան գործողություններին մասնակցած տղաներն անգամ չհեռացան ուսումից, ավելին` նրանց տրվեց զեղչային ճկուն հնարավորություն։
«Բուհերը 50 տոկոս զեղչ են անում մարտական գործողություններին մասնակցածների համար, իսկ մեր հիմնադրամը մարտական հերթապահություն անցածներին լրացուցիչ 20 տոկոս է զեղչում»,–ասաց Ավագյանը։
Դասադուլ հայտարարած ուսանողներից Վահան Կոստանյանն էլ հայտնում է` օրենքին դեմ է, քանի որ հավասարության սկզբունքը չի պահպանվելու։
«Օրենքը ոչ մի հավասարություն չի ստեղծում։ Նա, ով կարող էր կոռուպցիայի միջոցով ստանալ ակադեմիական տարկետում, հիմա նույն հաջողությամբ կարող է առողջապահական հարցերի բերումով ստանալ տարկետում, խնդիրը մի ոլորտից տեղափոխվում է մեկ այլ ոլորտ»,– ասաց ուսանողը։
ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվերով սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այդ քայլը միտված է վերացնելու հնարավոր կոռուպցիոն ռիսկերը։
