ԵՐԵՎԱՆ, 9 նոյեմբերի — Sputnik. Երևանի պետական համալսարանի ուսանողներն արդեն երրորդ օրն է՝ բողոքում են տարկետման իրավունքի վերացման դեմ։
Ուսանողների հիմնական կարգախոսն է. «տարկետում լինելու է», ինչպես նաև «ազատ, անկախ ուսանող»։
Ուսանողները շրջում են ԵՊՀ ֆակուլտետներում, որից հետո ծրագրում են քայլերթով բարձրանալ կառավարության շենքի մոտ։ Նրանց են միացել նաև այլ բուհերի ուսանողներ։
ՀՀ կառավարության ներկայացրած «Զինվորական ծառայության և զինծառայողի կարգավիճակի մասին օրենքի» նախագծով նախատեսվում է վերացնել ՀՀ պետական բուհերի պետպատվեր համակարգում սովորող ուսանողների համար գործող օրենքով նախատեսված տարկետման իրավունքը։ Կառավարության հիմնավորմամբ` այդ քայլը միտված է վերացնելու հնարավոր կոռուպցիոն ռիսկերը։ Օրենքն առաջին (ոչ վերջնական) ընթերցմամբ ընդունել է խորհրդարանը հոկտեմբերի 27-ին։
