ԵՐԵՎԱՆ, 9 նոյեմբերի — Sputnik. ԱՄՆ-ում բնակվող հայտնի դերասանուհի Անժելա Սարաֆյանը Instagram-ի իր էջում մի լուսանկար է հրապարակել, որում նա պատկերված է 90-ականներին բնորոշ ոճ ունեցող բնակարանում` հայկական գորգի ֆոնին։ Նա, ասես, ակնարկում է իր հայ լինելը։
Նուրբ վարդագույն երանգով մետաքսե զգեստն ու անբռնազբոսիկ կեցվածքն ավելի են ընդգծում բնակարանի հնաոճությունը և հարց ծնում` ի՞նչ է ուզում ասել դերասանուհին։
Նրա բազմազգ և բազմաթիվ բաժանորդներն իսկույն արձագանքել են այս լուսանկարին։
Օգտատերերից մեկը հայերեն գրել է. «Խալին ինչ ասես արժի»։ Չեն ուշացել նաև հաճոյախոսությունները. «Դու ֆանտաստիկ ես», «աննկարագրելի գեղեցկություն», «քո գեղեցկությունը նույնքան հրեշտակային է, որքան անունդ»։
Անժելա Սարաֆյանը ծնվել է Հայաստանում, 4 տարեկանից ապրում է ԱՄՆ-ում: 2000 թ.-ին Սարաֆյանն առաջին անգամ էպիզոդիկ դերով հանդես է եկել «Հեքիաթներ» հեռուստանովելում, այնուհետև խաղացել է բազմաթիվ այլ սերիալներում։ Անժելան խաղացել է «Տիկնիկ», «Kabluey», «Տեղեկատուները», «Գեղեցիկ կյանք» և «Հին ու բարի օրգի» ֆիլմերում, ինչպես նաև մարմնավորել է եգիպտացի վամպիր Տիայի դերը՝ «Մթնշաղ. Լուսաբաց. մաս 2» ֆիլմում։
Թերի Ջորջի «Խոստում» ֆիլմում Սարաֆյանը մարմնավորել է Մարալի կերպարը:
