ԵՐԵՎԱՆ, 9 նոյեմբերի — Sputnik. Հանրահայտ դերասան Արմեն Ջիգարխանյանի կինը` Վիտալինա Ցիմբալյուկ-Ռոմանովսկայան, հիվանդանոցում է։ Այս մասին հայտնում է Dni.ru-ն։
Այսօր Մոսկվայում` Կունցևոյի հաշտարար դատական №202 տեղամասում, մեկնարկել է նրանց ապահարզանի գործընթացը։ Ջիգարխանյանի փաստաբանը լրագրողներին հայտնել է, որ դիտարկվելու է միայն ամուսնալուծության հարցը, գույքային հարցերը, մասնավորապես երեք բնակարանի ճակատագիրը, առանձին են լուծվելու։ Ամուսնալուծվող ամուսինները նիստին ներկա չեն եղել։
Ավելի վաղ պարզվել է, որ Վիտալինային տեղափոխել են հիվանդանոց, սակայն հոսպիտալացման պատճառը չի նշվում։ Ամենայն հավանականությամբ, վերջին օրերի լարվածությունն անդրադարձել է նրա առողջության վրա։ Այժմ նրան հսկում են Կիևի բժիշկները։ Ավելի վաղ տեղեկություն էր տարածվել, որ Վիտալինան Մոսկվայում ծավալված սկանդալից հետո ծնողների հետ մեկնել է Վրաստան։
Փաստաբանի խոսքով, Արմեն Ջիգարխանյանը շատ լավ է զգում իրեն։ Նա, սակայն, չի հայտնել, թե հիմա որտեղ է ապրում դերասանը։
Վիտալինա Ցիմբալյուկ-Ռոմանովսկայայի փաստաբանը խուսափել է լրագրողներից։
Տեղամասի տարածք մտած լրագրողների մեկը հայտնել է, որ նա հեռացել է ավտոմեքենայով։ Պարզվել է, որ նա հեռացել է հետևի մուտքից։
Դատական հաջորդ նիստը կկայանա նոյեմբերի 27-ին։ Տեղամասի մամուլի քարտուղարը Sputnik-ին հայտնել է, որ հայցվորը պնդում է` հարցը դռնփակ քննարկվի։
Հիշեցնենք, որ կնոջ հետ բախումից հետո Արմեն Ջիգարխանյանը հոկտեմբերի 10-ին հայտնվել էր Մոսկվայի 57-րդ քաղաքային հիվանդանոցում, որտեղ մնացել էր 10 օր։ Հիվանդանոցում նա ասել էր, որ չգիտի` հետո ուր պետք է գնա, քանի որ ամբողջ գույքը կնոջ անունով է վերաձևակերպվել։
