ԵՐԵՎԱՆ, 9 նոյեմբերի — Sputnik. Կրեմլը չի որոշում վարորդական իրավունքը վերադարձնելու կամ դրանից զրկելու հարցերը, այսօր լրագրողներին ասել է Ռուսաստանի նախագահի մամուլի քարտուղար Դմիտրի Պեսկովը` մեկնաբանելով մրցարշավորդ Մառա Բաղդասարյանի դեպքը։
Պեսկովը հայտնել է, որ Մառա Բաղդասարյանի հարցով անօգուտ է երկրի նախագահին բողոքելը։ Նրա խոսքով` Կրեմլը քաղաքացիներին վարորդական իրավունքից զրկելու կամ վերադարձնելու լիազորություններ չունի։
Նոյեմբերի 7-ին Մառա Բաղդասարյանի փաստաբան Դավիթ Կեմուլարիան հայտարարել էր, որ եթե Բաղդասարյանի վարորդական իրավունքը չվերադարձնեն, ապա նա կդիմի նախագահին։
«Ո՛չ երկրի նախագահը, ո՛չ Կրեմլի վարչակազմը որևէ մեկին վարորդական իրավունքից զրկելու կամ այն վերադարձնելու լիազորություն չունեն։ Դրա համար անիմաստ է այդ հարցով դիմել», — ասել է Պեսկովը։
Նրա խոսքով` «ճանապարհային երթևեկության այդ օդիոզ մասնակցի» դեպքն առանձնահատուկ է և ավելի շուտ իրավապահ մարմինների գործն է։
Ավելի վաղ հայտնի էր դարձել, որ մրցարշավորդ Մառա Բաղդասարյանը չի վճարել ճանապարհային կանոնների խախտումների 15 հազար ռուբլու տուգանքը։
Մառա Բաղդասարյանը 2016 թվականի մայիսին հայտնի է դարձել որպես Gelandewagen-ով սկանդալային մրցավազքի մասնակից։ Նրան ձերբակալել են 2016 թվականի նոյեմբերին Մոսկվայի Լենինի անվան պողոտայում։
Ոստիկանության աշխատակիցները վարչական տուգանք են նշանակել սխալ կայանած ավտոմեքենայի համար, սակայն փաստաթղթերը ստուգելու ընթացքում տեսուչները հայտնաբերել են, որ աղջիկը չի վճարել 16 տուգանք։ Ավելի ուշ նա դատապարտվել է ուղղիչ աշխատանքներից խուսափելու համար կեղծ հիվանդության թերթիկ ներկայացնելու պատճառով։
