ԵՐԵՎԱՆ, 10 նոյեմբերի — Sputnik. Հայաստանի գյուղատնտեսության նախարարության Սննդամթերքի անվտանգության պետական ծառայությունը բացատրություն է պահանջել Ռոսսելխոզնադզորի տարածաշրջանային վարչությունից հայկական լոլիկների խմբաքանակի ոչնչացման վերաբերյալ։
Sputnik Արմենիային ծառայությունից հայտնել են, որ հարցում են ուղարկել Ռոսսելխոզնադզորին և մեկնաբանության են սպասում։ Ծառայությունից նշեցին, որ Ռոստովում ոչնչացրած հայկական լոլիկների խմբաքանակի արտահանման մասին որևէ տեղեկության չեն տիրապետում։
Հինգշաբթի հայտնի դարձավ, որ Ռոստովի մարզում հայկական լոլիկների խոշոր խմբաքանակ է ոչնչացվել, որը վտանգավոր վնասատու է պարունակել՝ հարավամերիկյան լոլիկի ցեց: Ռուսական ԶԼՄ–ների տվյալներով՝ 21 տոննա լոլիկը Հայաստանից էր ներմուծվել։ Խախտումը ստուգման ժամանակ բացահայտել էին Ռոսսելխոզնադզորի տեսուչները։
Ավելի վաղ հայտնում էին, որ Հայաստանի տարածքով թուրքական լոլիկների վերաարտահանում է իրականացվում։ Այդ երևույթը կանխելու նպատակով Ռուսաստանի ԴՄԾ ղեկավարի տեղակալ Ռուսլան Դավիդովն ասել էր, որ ռուսական մաքսակետը Հայաստանի և Ադրբեջանի գործընկերների հետ այդ երկրների տարածքով դեպի Ռուսաստան թուրքական լոլիկների վերաարտահանումը կանխելու արդյունավետ միջոց է գտել։
