ԵՐԵՎԱՆ, 14 նոյեմբերի — Sputnik. Հարկային տեսուչները հանգիստ չեն տալիս փոքր և միջին ձեռնարկատերերին, բայց մոռանում են մեծերի մասին։ Այս մասին այսօր խորհրդարանում ասաց ԱԺ փոխխոսնակ, «Ծառուկյան» դաշինքի ներկայացուցիչ Միքայել Մելքումյանը։
«Հարկային ստուգումները ջլատում են փոքր և միջին բիզնեսը` և՛ ֆիզիկապես, և՛ բարոյապես»,–ասաց նա։
Օլիգարխներից (չնշելով անուն) բողոքեց նաև Մելքումյանի գործընկերը «Ծառուկյան» դաշինքից` Նաիրա Զոհրաբյանը։
«Սա տեռոր է։ Անգամ գնորդներին են հարցաքննում` ումից ես գնել, կտրոն տվել է, թե ոչ։ Գնացեք գազի և բենզինի մոնոպոլիստներին ուսումնասիրեք»,–ասաց նա։
Նշենք, որ այսօր «Առինջ մոլ» առևտրի կենտրոնի աշխատակիցները Ազգային ժողովի դիմաց բողոքի ակցիա են իրականացնում ՀՀ ԿԱ Պետական եկամուտների կոմիտեի նոր կարգավորումների դեմ։Հիշեցնենք, որ ՊԵԿ-ն առևտրականների առաջ յուրաքանչյուր ապրանք փաստաթղթավորելու խնդիր է դրել. խնդիրը չկատարելու դեպքում առևտրականները կտուգանվեն:
Սա առաջացրել է վաճառողների դժգոհությունը. նրանք պնդում են, որ նախկինի համեմատ ավելի շատ հարկ են վճարելու։ Բացի այդ, վերջիններս նշում են, որ տվյալ գործունեության մեջ այդ պայմանը կատարելն անհնար է: Առևտրականները հայտնեցին, որ երեկվանից ստորագրահավաք են կազմակերպել, ցանկանում են դիմել ԱԺ 4 կուսակցություններին, որ ուշադրություն դարձնեն այս խնդրին:
