ԵՐԵՎԱՆ, 16 նոյեմբերի – Sputnik, Լաուրա Սարգսյան. Հայկական կողմը վրացի գործարար Թեմուր Չկոնիային McDonald's արագ սննդի ռեստորանի բացման համար հինգ վայր է առաջարկել։ Այդ մասին Sputnik Արմենիայի թղթակցի հետ զրույցում ասաց գործարարը։
«Ինձ Երևանում հինգ վայր են առաջարկում, սակայն ես չեմ բացառում, որ առաջին McDonald's–ը կբացվի մայրաքաղաքի գլխավոր հրապարակի մոտակայքում։ Կարծում եմ` հրապարակը ռեստորանի համար ամենահամապատասխան վայրն է», – ասաց Չկոնիան։
Նրա խոսքով` հարցը կլուծվի այն ժամանակ, երբ նա Երևան գա ու հանդիպի երկրի իշխանությունների համապատասխան ներկայացուցիչների հետ։ Չկոնիան արդեն մոտ երկու տարի է փորձում է Հայաստանում McDonald's բացել։ Գործարարը համապատասխան թույլտվություն ստացել է, խնդիրը ռեստորանի վայրն ընտրելն է։
Սակայն գործարարը չի հուսահատվում և հայկական մամուլի ու սոցցանցի օգտատերերի բազմաթիվ հարցադրումներին ու բողոքներին պատասխանում է, որ Հայաստանում նախագիծը ավարտին հասցնելու մտադրությունն անխախտ է։ Այստեղ բիզնես սկսելու հարցերը Չկոնիան ամբողջությամբ իր վրա է վերցնում` նշելով, որ McDonald's –ը Հայաստանում նաև մի քանի տասնյակ մարդու աշխատանք ունենալու հնարավորություն կընձեռի։
Վրացի գործարար Թեմուր Չկոնիայի բանակցությունները Հայաստանի ղեկավարության հետ McDonald's առաջին ռեստորանի շինարարության մասին շարունակվում են։
Չկոնիան նախատեսում է Հայաստանում, ընդհանուր առմամբ, յոթ նման սննդի կետ բացել։ Ներկա պահին նախագիծը իրականացման փուլում է։ Ռեստորանը կառուցելու համար 1500 քմ մակերես ունեցող տարածք է հարկավոր։
Հայաստանում ռեստորանը բացելու հարցը որոշվում էր Օռլանդոյում (ԱՄՆ, Ֆլորիդայի նահանգ) McDonald's ընկերության ներկայացուցչի հետ հանդիպման շրջանակներում։ Թբիլիսիում հայտնի ցանցի առաջին ռեստորանը Թեմուր Չկոնիան բացեց 90-ականներին։ Այժմ Վրաստանում աշխատում է McDonald's արագ սննդի մի քանի կետ։ Բացի այդ, գործարարը նաև Վրաստանում Coca-Cola գործարանի և մի շարք այլ ձեռնարկությունների սեփականատերն է։
