ԵՐԵՎԱՆ, 16 նոյեմբերի — Sputnik. Հայաստանի ԱԳՆ դեռևս չի հաստատում այն ինֆորմացիան, որ Հայաստանի և Ադրբեջանի արտաքին գերատեսչության ղեկավարները կհանդիպեն դեկտեմբերին Վիեննայում։
Ինչպես Sputnik Արմենիային ասաց ՀՀ ԱԳՆ մամուլի քարտուղար Տիգրան Բալայանը հայկական կողմը ԵԱՀԿ ՄԽ համանախագահների առաջարկի մասին հայտարարել է դեռևս 2 օր առաջ։
«Երբ հստակ լինեն հանդիպման ժամկետները, մենք անպայման կհաղորդենք այդ մասին»,–ասաց Բալայանը։
Ավելի վաղ Ադրբեջանի ԱԳՆ ներկայացուցիչ Հիկմեդ Գաջիևը ՌԻԱ Նովոստիին ասել էր, որ ղարաբաղյան հակամարտության քննարկման համար Հայաստանի և Ադրբեջանի ԱԳ ղեկավարները կհանդիպեն դեկտեմբերի 7–8 Վիեննայում։
ՀՀ ԱԳՆ Էդվարդ Նալբանդյանի և Ադրբեջանի ԱԳՆ Էլմար Մամեդյարովի վերջին հանդիպումը տեղի է ունեցել հուլիսի 11–ին, Բրյուսելում ԵԱՀԿ Մինսկի խմբի համանախագահների նախաձեռնությամբ։
