ԵՐԵՎԱՆ, 17 նոյեմբերի — Sputnik. Միլիոնատեր Ալեքսիս Օհանյանի և թենիսիստուհի Սերենա Ուիլյամսի հարսանիքը տեղի է ունեցել երեկ: Արևմտյան ԶԼՄ-ներն արդեն այն կոչել են «բոլոր ժամանակների ամենաշքեղ հարսանիքը»: Այս մասին գրել է օնլայն Daily Mail-ը:
Արարողությանը ներկա են գտնվել Ամերիկայի «ամենագլամուրային» հայտնիները՝ Քիմ Քարդաշյանը, երգչուհի Բեյոնսեն, դերասանուհի Եվա Լոնգորիան և ուրիշ շատ հայտնի աստղեր շոու-բիզնեսի և սպորտի աշխարհից:
Կայքի տվյալներով՝ հարսանիքը կայացել է ամերիկյան Նոր Օրլեան քաղաքի ժամանակակից արվեստի կենտրոնում:
Ավելի վաղ լրատվամիջոցները գրել էին, որ աստղային զույգը իր մեկ միլիոն դոլարանոց հարսանիքի տեղն ու ժամանակը գաղտնի է պահելու:
Սիրահարներին շնորհավորել է նաև Ուիլյամսի մարզիչը՝ հանրահայտ Պատրիկ Մուրատողլուն՝ Instagram-ի իր էջում հրապարակելով նրանց նկարն ու բարեմաղթանք գրելով:
Հիշեցնենք, որ Օհանյանն ու Ուիլյամսը հայտնել էին ամուսնանալու մտադրության մասին 2016 թվականի դեկտեմբերին` նշանադրության ժամանակ։ Նրանք նշել էին, որ մտադիր են հարսանիք կազմակերպել երեխայի ծնվելուց անմիջապես հետո։
«Մեծ սաղավարտի» մրցումների 23-ակի հաղթող Սերենա Ուիլյամսը և ամերիկահայ գործարար, Reddit-ի համահիմնադիր Ալեքսիս Օհանյանը ծնող են դարձել 2017 թվականի սեպտեմբերի 1-ին։ Ծնվել էր նրանց գեղեցկուհի դուստրը` Օլիմպիան, որը կշռում էր 3 090 գրամ։
