ԵՐԵՎԱՆ, 19 նոյեմբերի — Sputnik. Երևանի մետրոպոլիտենի տարբեր կայարաններից այսօր ստացված ահազանգերը կեղծ էին: Այս մասին Sputnik Արմենիային ասաց Ոստիկանության հասարակայնության հետ կապերի բաժնի պետ Աշոտ Ահարոնյանը
«Զինված հարձակման մասին լուրերը բացարձակ չեն հապատասխանում իրականությանը: Անանուն զանգի հեղինակը հայտնաբերվել է և բերման ենթարկվել»,-ասաց նա:
Մետրոպոլիտենում կարճ ժամանակով գնացքների միակողմանի աշխատանքի խափանումը զուտ տեխնիկական պատճառներ ունի:
»Գնացքների շարժը իրոք խափանվել է, բայց զուտ տեխնիկական պատճառներով: Հիմնական գիծ է դուրս եկել անսարք գնացք, որը կարճ ժամանակ անց հեռացվել է: Մի կարճ ժամանակ Հանրապետության հրապարակ կայարանի ուղղությամբ շարժումը միակողմանի էր, իսկ այժմ ամբողջությամբ վերականգնվել է» Sputnik Արմենիայի զանգին ի պատասխան ասաց Երևանի մետրոպոլիտենի մամուլի քարտուղար Նինել Վարդանյանը:
Հիշեցնենք, ոչ այսօր առավոտյան Ոստիկանություն ահազանգ է ստացվել, որ «Երիտասարդական» մետրոյից մի քաղաքացի՝ զինված դանակով և հրազենով, դուրս է եկել և սպառնում է քաղաքացիներին։
Ահազանգով ժամանած ոստիկանները, մինչ կպարզեին եղելությունը, հերթական ահազանգն է ստացվում, այս անգամ՝ «Շենգավիթ» մետրոյի կայարանի հատվածից։ Ոստիկանության մի խումբը մեկնում է «Շենգավիթ» մետրոյի հատված, որտեղ էլ սկսում են ճշտել ահազանգի ճշմարտացիությունը։
Կարճ ժամանակ անց նմանատիպ ահազանգ է ստացվում, այս անգամ Հանրապետության հրապարակի մետրոյի կայարանից, ու հիմա Ոստիկանությունը պարզում է, թե արդյո՞ք տեղեկությունը համապատասխանում է իրականությանը: Քաղաքացիների անվտանգությունից ելնելով՝ ժամանակավորապես երթևեկությունը Մետրոպոլիտեբի նշված հատվածում դադարեցվել է։
