ԵՐԵՎԱՆ, 25 նոյեմբերի — Sputnik. «Руки вверх» խմբի մենակատար Սերգեյ Ժուկովը հենց Հայաստանում է գտել իր իրական երջանկությունը։
Ժուկովի կինը՝ «Сливки» խմբի նախկին մեներգչուհի Ռեգինա Բուրդը, Peopletalk պարբերականի հետ հարցազրույցում պատմել է՝ ինչպես է ծանոթացել ապագա ամուսնու հետ, երբ դեռ ամեն մեկն իր խմբի կազմում էր հանդես գալիս։ Երևանյան ուղևորությունը ճակատագրական է եղել նրանց համար։
«Մենք եկել էին քաղաքի օրվա կապակցությամբ կազմակերպված համերգին մասնակցելու, բայց համերգը չեղարկվեց։ Ռեստորան գնացինք, շատ գեղեցիկ վայր էր։ Սերգեյն ամբողջ երեկոյի ընթացքում փորձում էր սիրահետել ինձ, իսկ ես շատ էի ամաչում (ծիծաղում է)։ Հետո նա ադմինիստրատորիս միջոցով բարևներ էր ուղարկում․ «Օլեգ, խնդրում եմ, բարևներ փոխանցիր ապագա կնոջս», — պատմել է Ռեգինան։
Այդ ուղևորությունից կես տարի անց նրանք սկսել են հանդիպել և միանգամից որոշել են ամուսնանալ։
«Սերյոժան ինձ առաջարկություն արեց մեր ծանոթանալուց կես տարի անց։ Նա ինձ զբոսանավով զբոսանքի հրավիրեց։ Հետո հանեց մատանին ու առաջարկություն արեց», — հիշում է «Сливки» խմբի նախկին մեներգչուհին։
Արդեն տասը տարի է` նրանք միասին են, երեք երեխա ունեն` Նիկան, Էնջելն ու Միրոնը։ Ռեգինան բիզնեսով է զբաղվում. նրանց ընտանեկան CupCake Story հրուշակարանն արդեն միլիոնների շրջանառություն ունի։ Իսկ Սերգեյ Ժուկովը շարունակում է հյուրախաղերով հանդես գալ Ռուսաստանում և հետխորհրդային երկրներում։
