Պաշտոնական վիճակագրության համաձայն` 2016թ. հոկտեմբերի համեմատ կարագի գինն աճել է 40-50%- ով, մսամթերքինը` 30, դեղորայքինը` 2%-ով, վերջին օրերին ևս 500 դրամով թանկացել է զելանդական կարագի արժեքը, ձվի գինը հասել է 90 դրամի: Եվ չնայած դրան, գնաճի պաշտոնական մակարդակը, ՀՀ ազգային վիճակագրական ծառայության հաշվարկով, անցած տարվա հոկտեմբերի համեմատ կազմել է ընդամենը 1.2%:
Թե ինչու է վիճակագրությունն այսքան տարբերվում իրականությունից, Sputnik Արմենիայի հետ զրույցում մեկնաբանում է տնտեսագետ Ատոմ Մարգարյանը:
«Եթե նայենք, այո, այդպես է գնաճը 10 ամսվա տվյալներով`1.2%, և սպառողական գների ինդեքսը, ԱՎԾ տվյալներով, նույնիսկ մեկ տոկոսն էլ չի գերազանցում, որովհետև այնտեղ, բացի առաջին անհրաժեշտության ապրանքներից ու սննդամթերքից, դրված են, ասենք, լվացքի փոշու կամ հագուստ, կոշկեղենի գները, թեև այստեղ էլ ավելի քան 8% գնաճ կա: Այսինքն՝ դա միջինացված ցուցանիշ է՚,- ասում է Մարգարյանը:
Տնտեսագետի խոսքով, առաջին անհրաժեշտության ապրանքների թանկացումն առաջինն իր վրա բացասաբար է զգալու բնակչության հատկապես առավել խոցելի խավը, իսկ որ այդ ապարանքները շատ ավելի են թանկացվել, քան ԱՎԾ ներկայացրած տվյալներն են, Ատոմ Մարգարյանը չի վիճարկում:
