ԵՐԵՎԱՆ, 29 նոյեմբերի – Sputnik. Լոռու մարզի դատախազի որոշմամբ, դադարեցվել է քրեական հեղինակություն «Ճաճոյի Էդոյի» որդու` Տիգրան Մարտիրոսյանի սպանության մեջ մեղադրվող կնոջ նկատմամբ քրեական հետապնդումը։ Այս մասին Sputnik Արմենիային հայտնեցին ՀՀ քննչական կոմիտեից։
Նախաքննական մարմինը նախաքննությունն ավարտել է, նյութերն ուղարկել դատախազություն՝ հաստատելու եւ դատարան ուղարկելու համար, բայց դատախազը քրեական գործը կարճելու որոշում է կայացրել` մեղադրյալ կնոջ գործուն զղջման հիմքով։
Տիգրան Մարտիրոսյանի դին` հրազենային վնասվածքներով, հայտնաբերվել էր 2017թ. մայիսի 25-ի կեսգիշերին նրա տան տարածքում։ Ավելի ուշ պարզվել էր, որ տղամարդուն կրակել էր կինը` վիճաբանության ժամանակ։
Քրեական գործի նախաքննության ընթացքում հայտնի էր դարձել, որ ամուսինը պարբերաբար բռնության է ենթարկել կնոջը, իսկ դեպքի օրը Տիգրան Մարտիրոսյանը ալկոհոլային հարբածության վիճակում վիճաբանության ժամանակ տարբեր իրեր է նետել կնոջ ուղղությամբ, ապա լիցքավորված ատրճանակը պահել է կնոջ գլխին` սպառնալով սպանել։ Կինը հրելով ամուսնուն` նրա ձեռքից խլել է ատրճանակն ու կրակել:
Սպանված 33-ամյա Տիգրան Մարտիրոսյանը, տարբեր տեղեկություններով, տարիներ շարունակ ծեծել ու նվաստացրել է կնոջը:
