ԵՐԵՎԱՆ, 1 դեկտեմբերի — Sputnik. Այսօր՝ դեկտեմբերի 1-ին, մահվան ելքով վրաերթ է տեղի ունեցել Երևանում: Ժամը 08:20-ի սահմաններում Երևան քաղաքի բնակիչ, 66-ամյա Մկրտիչ Թադևոսյանը իր վարած Mercedes մակնիշի համարանիշի ավտոմեքենայով Էրեբունի փողոցում «Ուզբեկտկանի» խանութի դիմաց, վրաերթի է ենթարկել 50-55 տարեկան մի կնոջ: Այս մասին հայտնում է shamshyan.com-ը:
Կայքի տեղեկություններով, վարորդը փախուստի չի դիմել, օգնել է կնոջը տեղափոխել Էրեբունի բժշկական կենտրոն, բայց նա ճանապարհին մահացել է:
Դեպքի վայրում հավաքվածները հայտնել են, որ հետիոտնը փողոցը անցնելիս է եղել չթույլատրվող հատվածով, և նրա հետ է եղել նաև դուստրը, որ հրաշքով փրկվել է:
Դեպքի վայր են ժամանել Ճանապարհային Ոստիկանության 1-ին սպայական գումարտակի 4-րդ դասակի ավագ տեսուչ Սուրեն Ջաղաբյանն ու տեսուչ Սամվել Կոստանդյանը:
Փաստի առթիվ Մ. Մուրադյանի որոշմամբ հարուցվել է քրեական գործ՝ ՀՀ քր. օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով:
Քննիչի հանձնարարականով ավտոմեքենան տեղափոխվել է Երևանի ՃՈ պահպանվող հատուկ տարածք: