ԵՐԵՎԱՆ, 3 դեկտեմբերի — Sputnik. Հայի և վրացու մշտնջենական կռվի մասին հիթ դարձած երգը շարունակում է իր «հաղթարշավը»: Այս անգամ այն հնչել է ռուսական առաջին՝ ОРТ հեռուստաալիքի «Поле чудес» («Հրաշքների դաշտ») հաղորդման շրջանակում:
Վրացի երգիչ Արչի Պուրցելաձեն ոչ միայն մասնակցեց «Поле чудес» («Հրաշքների դաշտ») խաղին և, ավանդույթի համաձայն, հաղորդմանը նվիրեց իր երկրի բարիքները, այլ նաև գրավեց հանդիսատեսի ու հեռուստադիտողի սրտերը՝ իր հայ ընկեր Գագիկ Եզակյանի հետ կատարելով «Հայն ու վրացին կամ հավերժական պայքար» երգը:
Դրան նախորդեց իսկական վրացական կենացը: «Ինչ եմ ուզում ասել, առաջին հերթին, որպես վրացի: Ես պետք է ձեզ խնդրեմ անպայման խմել ինձ հետ: Փոքր կենաց՝ վրացու կողմից: Վրացիների 1-ին և ամենակարևոր կենացը հնչում է այսպես. «Փառաբանենք Աստծուն, որ երկնքում է, իսկ մեզ մաղթենք խաղաղություն և երջանկություն»»,-ասաց Պուրցալաձեն:
«Հայն ու վրացին կամ հավերժական պայքար» երգը' հայտնի «Միմինո» ֆիլմի մոտիվներով, Գագիկ Եզակյանի և Արչի Պուրչալաձեի կատարմամբ, շարունակում է գրավել հայերի և վրացիների սրտերը: Երաժշտության հեղինակը վրացի Զազան է, խոսքերինը՝ հայ Ժորան:
Այն խաղարկային երգ է հայի և վրացու հավերժական վեճի մասին՝ որն է ավելի լավ երկիր՝ Հայաստանը, թե Վրաստանը: Տեսահոլովակում ներառվել են հայտնի «Միմինո» ֆիլմից հատվածներ և, իհարկե, այն հատվածը, որտեղ Ռուբիկը (Ֆրունզիկ Մկրտչյան) և Վալիկոն (Բուբա Կիկաբիձեն) քննարկում են, թե որ երկրի ջուրն է աշխարհում ամենալավը:
