ԵՐԵՎԱՆ, 4 դեկտեմբերի — Sputnik, Լաուրա Սարգսյան. Armenia ավիաընկերության շարքերը 2018 թվականին ավելի քան տասը նոր բորտուղեկցորդ կհամալրեն, Sputnik Արմենիայի հետ զրույցում ասաց ընկերության փոխտնօրեն Գևորգ Խաչատրյանը։
Armenia-ն հայտերն ընդունում է մինչև դեկտեմբերի 10-ը։ Նոր կադրերի ուսման ծախսերը կհոգա ավիաընկերությունը։
«Մենք սկսել ենք հայտեր ընդունել։ Դեկտեմբերի 10-ին մինչև տարեվերջ ընկած ժամանակահատվածում ստացած հայտերից հարցազրույցի միջոցով թեկնածուներ կընտրենք բորտուղեկցորդների պաշտոնի համար։ Նրանք երկամսյա ուսուցում կանցնեն Armenia-ի ավիացիոն ուսումնական կենտրոնում և մեկամսյա պրակտիկա, որից հետո կհամալրեն քաղավիացիայի և մեր ընկերության շարքերը», — ասաց Խաչատրյանը։
Մրցույթը հաղթահարելու գլխավոր պայմաններն են մասնագիտությամբ աշխատելու ցանկությունը, առողջությունն ու նյարդերը, մրցույթի մասնակիցները պետք է լինեն 18-26 տարեկան, տիրապետեն հայերենի, ռուսերենի և անգլերենի։
Եվս մեկ առանցքային պահ կա` բորտուղեկցորդուհիների կամ բորտուղեկցորդների հասակը ուղղահայաց բարձրացրած ձեռքով պետք է կազմի ոչ պակաս, քան 212 սմ։ Ընդ որում, հայտեր կարող են ներկայացնել նաև փորձ չունեցող անձինք, որոնք ցանկանում են բորտուղեկցորդ աշխատել։
«Մեզ համար միշտ կարևոր է եղել, որ բացի գործող բորտուղեկցորդներից և օդաչուներից, քաղավիացիայի բնագավառում նոր դեմքեր հայտնվեն։ Երկու տարվա ընթացքում ավիաընկերությունը կարողացավ վերապատրաստել հինգ երկրորդ օդաչուների և երկու կապիտանի», — ասաց Խաչատրյանը։
«Armenia»-ն ներկա փուլում չվերթեր է իրականացնում նաև դեպի Մինվոդի, Թել Ավիվ, Բեյրութ: Ավիաընկերությունը մտադիր է կանոնավոր չվերթեր գործարկել նաև նոր ուղղություններով։
«Armenia»-ի ավիապարկում երկու ինքնաթիռ կա` Boeing 737-500, Boeing 737-700։ Ընկերությունն ունի 53 աշխատակից։
Ավիաընկերության հիմնադիրներն են Աշոտ Թորոսյանը (51 տոկոս բաժնետոմս), Թամազ Գաիաշվիլին (24 տոկոս) և Ռոբերտ Օգանեսյանը (25 տոկոս): Հայաստանն ազգային ավիափոխադրողից զրկվել է 2013 թվականին` «Արմավիա» ընկերության սնանկացումից հետո:
Հայրենական ավիաշուկայում այսօր երկու հայկական ընկերություն է գործում` «Armenia»-ն և «Տարոն-ավիան»։
