ԵՐԵՎԱՆ, 4 դեկտեմբերի — Sputnik. Դեկտեմբերի 4-ն աշխարհում ընդունված է որպես Ձմեռ պապին նամակ գրելու ու նրանից նվեր խնդրելու օր։
Այսօրվանից սկսած` աշխարհի շատ երկրներում փոստային ծառայությունները սկսում են ընդունել ու ուղարկել Ձմեռ պապիկին հասցեագրված նամակները։
Մի շարք երկրներում նույնիսկ հատուկ գրասենյակներ են բացվում, որտեղ երեխաներին օգնում են նամակ գրել ու ուղարկել։
Հայաստանը ևս բացառություն չէ։ Ինչպես Sputnik Արմենիային հայտնեց «Հայփոստ» ՓԲԸ–ի մամուլի քարտուղար Գևորգ Աբրահամյանը, հայաստանյան բոլոր փոստային բաժանմունքներում ևս արդեն սկսել են ընդունել Ձմեռ պապին ուղղված նամակները։
««Ձմեռ պապին» կամ «Լապլանդիա» հասցեագրված նամակները պարտադիր ընդունվում են «Հայփոստի» աշխատակիցների կողմից։ Նամակ բերած որևէ երեխա երբեք մերժում չի ստանում»,– ասաց Աբրահամյանը։
Ձմեռ պապին հասցեագրած նամակը կարելի է գցել փոստարկղ կամ անձամբ այն ներկայացնել փոստային ցանկացած բաժանմունք։ Բայց, որպեսզի Ձմեռ պապը պատասխանի ձեր նամակներին, դրանում պետք է նշել հետադարձ հասցեն։ «Հայփոստում» վստահեցնում են, որ այդ դեպքում երեխան Ձմեռ պապից, անպայման, շնորհավորական բացիկ կստանա։
