ԵՐԵՎԱՆ, 4 դեկտեմբերի — Sputnik. «Կապույտ թռչուն» համաշխարհային տաղանդների շոուի ընթացքում հայ պատանինների կատարումը շատ է դուր եկել հաղորդման ժյուրիի անդամներին։ Նրանք կատարել են «Բարձրահասակ շիկահերը սև կոշիկներով» ("Высокий блондин в черном ботинке") ֆրանսիական ֆիլմի երաժշտությունը։
Երիտասարդ հայ կատարողները ֆիլմի երաժշտությունը հնչեցրել են հայկական ժողովրդական գործիքների օգնությամբ։ Էդուարդ Միսկարյան (դուդուկ), Սյուզի Գաբրիելյան (քանոն), Էլիմ Ներսեսյան (դհոլ)։
Ժյուրիի անդամ ռուսական բալետի արտիստ և ուսուցիչ Նիկոլայ Ցիսկարիձեն ասաց, որ ուրախ է այստեղ տեսնել իր «համարյա համերկրացիներին»։
«Չգիտեի, որ այս հրաշք երաժշտությունը` գրված ֆրանսիական ֆիլմի համար, կարող է կատարվել նաև այսպիսի երաժշտական գործիքներով։ Մանավանդ`դհոլի օգնությամբ։ Շնորհակալություն մեզ լավ տրամադրություն հաղորդելու համար»,–նշեց նա։
Դենիս Մացուևը` ժյուրիի մյուս անդամը, նույնպես զարմացած էր, որ հայկական ժողովրդական գործիքներով հնարավոր է նման բան նվագել։
«Երբ ժողովրդական գործիքներն են նվագում` միշտ յուրահատուկ կոլորիտ կա, իսկ նման պատանի կատարողներով`առավել ևս։ Շնորհավորում եմ ձեզ, մենք գերագույն հաճույք ստացանք։ Հուսով եմ` ձեր տրիոյին մեծ ապագա է սպասվում»։
Ելույթից հետո պատանի երաժիշտներից յուրաքանչյուրը ներկայացրեց իր գործիքը, իսկ Սյուզին քանոն վրա նվագեց ռուսական ժողովրդական մի երգ։
Նախագծում տրիոյի հետագա ճակատագիրը կախված է հանդիսատեսից։
