ԵՐԵՎԱՆ, 5 դեկտեմբերի — Sputnik. Հայաստանը Ռուսաստանի հետ նախօրոք պայմանավորվել է չհրապարակել ձեռք բերվող զենքի ցանկը։ Խորհրդարանում պաշտպանական վարկի նախագծի քննարկման ժամանակ այս մասին հայտնեց ՀՀ պաշտպանության փոխնախարար Արտակ Զաքարյանը։
ՌԴ-ն ﬕնչև 100 ﬕլիոն դոլարի պետական արտահանման վարկ է տրամադրելու Հայաստանի կառավարությանը՝ ռուսական արտադրության ռազմական նշանակության արտադրանքի մատակարարումների ֆինանսավորման համար: Վարկը Հայաստանին տրամադրվելու է 5 տարի ժամկետով՝ 3 տոկոս տոկոսադրույքով։ Այս պահին նախաստորագրվել են երեք համաձայնագիր, որոնց ընդհանուր արժեքն ավելին է, քան 100 մլն դոլարը։ Վարկի փաստացի օգտագործված գումարը մարվելու է 5 տարվա ընթացում՝ սկսած 2023 թ-ից:
«Այս 100 մլն դոլարը կազմում է կնքված համաձայնագրերի ընդհանուր արժեքի մոտ 90 տոկոսը»,- ասաց Զաքարյանը։
Ռուսական կողմը նշել էր, որ պետք է զենքի մատակարարման մասին տեղեկություն հրապարակի։ Սակայն, Զաքարյանի խոսքով, հայկական կողմը նախնական պայմանավորվածության է հասել, որպեսզի պայմանագրերը չհրապարակվեն։
«Նախնական պատվերներն արդեն կան տարածաշրջանային նշանակության սպառազինության համար։ Ռուսական կողմից ձգձգումներ չեն սպասվում։ Քանի որ չի ենթադրվում, որ այնտեղ պետք է առանձին վավերացում լինի, վարկը մեխանիկորեն կընդգրկվի 2018 թվականի Ռուսաստանի պետական բյուջեում», — պարզաբանեց Զաքարյանը։
Հայաստանի և Ռուսաստանի միջև 200 մլն դոլարի սպառազինության մատակարարումների վերաբերյալ առաջին պայմանագիրը ստորագրվել էր դեռ 2015 թվականի հունիսի 25-ին, սակայն միայն 2016 թվականի փետրվարի 10-ին ուժի մեջ մտավ։
