ԵՐԵՎԱՆ, 5 Դեկտեմբեր — Sputnik. Հայաստանը ռուսաստանցիների վստահելի երկրների առաջին եռյակում է, ասված է Համառուսաստանյան կարծիքի ուսումնասիրման կենտրոնի հայտարարության մեջ։ Ռուսաստանցի հարցվածները ուսումնասիրության ընթացքում պատասխանել են` ինչպես են նրանք գնահատում ԱՊՀ երկրների կայունությունը, դրանցից որին կուզեին տեսնել Ռուսաստանի գործընկերոջ դերում, որ երկրում եմ լավ պաշտպանված ռուսախոս բնակչության շահերը ու նաև ասել են, թե ԱՊՀ երկրների ղեկավարներից ում են ամենաշատը վստահում նրանք։
Հայաստանն ամենակայուն և հաջողակ երկիր համարում է հարցվածների 16%–ը։ Այստեղ մենք զբաղեցրել ենք 3–րդ տեղը` Բելառուսից և Ղազախստանից հետո։ 4–րդ տեղում Ադրբեջանն է` 14% ձայներով. Հնգյակը եզրափակում է Վրաստանը` վերջին 7 տարիների համար ռեկորդային 10%–ով։ Վերջին տեղը զբաղեցրել է Ուկրաինան`ստանալով ձայների 1%–ը։
«Ռուսալեզու բնակչության իրավունքների պաշտպանության հարցում Բելառուսն ու Ղազախստանը կրկին առաջատար են։ Մյուս երկրներն ահագին հետ են այս հարցում. Հայաստան`11%, Ադրբեջան`6%, Վրաստան`6%, Ղրղըզստան` 6%, Ուզբեկստան` 5%, Տաջիկստան` 4%, Ուկրաինա`5%, Թուրքմենիա` 2%»,–ասված է հաղորդագրության մեջ։
ԱՊՀ երկրների ղեկավարների հանդեպ վստահության առումով Հայաստանը դիրքերը զիջում է Ադրբեջանին։ Կրկին առաջին 2 տեղը զբաղեցնում են Բելառուսն ու Ղազախստանը. Ալեքսանդր Լուկաշենկո` 62%, Նորսուլթան Նազարբաև`56%, 3–րդ տեղում Իլհամ Ալիևն է 12%–ով ձայներով, Սերժ Սարգսյանը նրան զիջում է 1%–ով` 11%։
