ԵՐԵՎԱՆ, 8 դեկտեմբերի — Sputnik. Ամերիկյան KPBS հեռուստաալիքն ու Կոնֆլիկտների լուծման ազգային կենտրոնը (NCRC) որոշում են կայացրել «Համայնքի հերոս» կոչումը շնորհել ամերիկահայ բնապահպան Դայանա Թաքվորյանին, հայտնում է KPBS հեռուստաալիքը։
Ակտիվիստը Սան Դիեգոյից (Կալիֆոռնիա) արդեն երկար տարիներ պայքարում է էկոլոգիական խնդիրների դեմ, ինչի համար և ստացել է այդ կոչումը։
«ԱՄՆ խոշոր կազմակերպություններն ու քաղաքական գործիչները, այդ թվում նաև ԱՄՆ նախկին նախագահ Բարաք Օբաման, նշել են Թաքվորյանի ձեռքբերումները շրջակա միջավայրի պահպանման համար։ Նրա շնորհիվ Ամերիկայում բացահայտվել են շրջակա միջավայրի պահպանության հետ կապված բազմաթիվ խնդիրներ», – ասվում է հեռուստաընկերության հաղորդագրության մեջ։
Դայանա Թաքվորյանը Հայոց ցեղասպանությունը վերապրածների հետնորդն է, 1980 թվականին նա հիմնել է Էկոլոգիական առողջության կոալիցիան (Environmental Health Coalition), որը մինչ օրս արդյունավետորեն պայքարում է ԱՄՆ–ում էկոլոգիական ու սոցիալական արդարության համար։
