ԵՐԵՎԱՆ, 9 դեկտեմբերի — Sputnik. 2012 թվականի օլիմպիական խաղերի բրոնզե մեդալակիր, Ռուսաստանը ներկայացնող բռնցքամարտիկ Միխայիլ Ալոյանը հաղթեց Նիկարագուայի ներկայացուցիչ Էրմոհենես Կաստիլիոյին և թեթևագույն քաշային կարգում WBA International վարկածով չեմպիոնի կոչում նվաճեց։ Այս մասին հայտնում է Ռ-Սպորտը:
Կեմերովոյում բռնցքամարտի երեկոյի շրջանակում անցկացված այսօրվա մարտը ծանր էր:
Արդյունքում հաղթանակը շնորհվեց 29-ամյա Ալոյանին:
Ալոյանը երրորդ հաղթանակը տարավ պրոֆեսիոնալ ռինգի երեք մարտում: Կաստիլիոն իր կարիերայի առաջին պարտությունը կրեց (12 հաղթանակ, որոնցից 4-ը` նոկաուտով):
Ավելի վաղ «Պատրիոտ» փրոմոութերական ընկերության նախագահ Ալեքսանդր Պոպովը «Ռոսիա սեգոդնյա» ՄՏԳ-ում կազմակերպված ասուլիսի ժամանակ հայտնել էր, որ փետրվարի 2-ին Ալոյանը ռինգ դուրս կգա Սոչիում IBF չեմպիոնական գոտու տիրակալ Մուրատ Հասիևի և WBA Regular չեմպիոն կուբացի Յունիեր Դորտիկոսի մրցամարտից առաջ` Բռնցքամարտի համաշխարհային սուպերսերիայի կիսաեզրափակիչ փուլում:
