ԵՐԵՎԱՆ, 9 դեկտեմբերի — Sputnik. Դատելով Cumhuriyet թուրքական պարբերականում հրապարակված փաստաթղթից` Թուրքիան Երուսաղեմն Իսրայելի մայրաքաղաք է ճանաչել ԱՄՆ նախագահ Դոնալդ Թրամփից առաջ:
Փաստաթուղթը ստորագրել են Թուրքիան և Իսրայելը հակամարտության կարգավորման շրջանակում: Հակամարտությունն առաջացել էր 2010 թվականին Իսրայելի ռազմածովային ուժերի կողմից «Ազատության նավատորմի» վրա իրականացված հարձակման պատճառով:
Cumhuriyet-ը ներկայացնում է հակամարտության կարգավորման մասին թուրք-իսրայելական պայմանագրի պատճենը, որում կողմերը համաձայնության են գալիս Իսրայելի կողմից փոխհատուցում ստանալու վերաբերյալ: Համաձայնագրի վեցերորդ կետում գրված է հետևյալը.
«Համաձայնությունը ձեռք է բերվել 2016 թվականի հունիսի 28-ին Անկարայի և Երուսաղեմի միջև և կազմվել է երեք լեզվով` թուրքերեն, եբրայերեն և անգլերեն: Բովանդակային տարբերություններ նկատելու պարագայում առաջնահերթություն է պետք տալ անգլերեն տարբերակին»:
Այդպիսով, նշում է Cumhuriyet-ը, քանի դեռ իշխող «Արդարություն և զարգացում» կուսակցությունն ի դեմս առաջնորդ, նախագահ Ռեջեփ Թայիփ Էրդողանի մեղադրում է ԱՄՆ-ին միջազգային նորմերը խախտելու մեջ, Թուրքիան դեռ մեկ տարի առաջ է ճանաչել Երուսաղեմի կարգավիճակը` որպես Իսրայելի մայրաքաղաք, և պայմանագիր ստորագրել արդեն իսկ իր մայրաքաղաք Անկարայի անունից:
«Սակայն մոռացել է այդ մասին», — հեգնանքով ավելացնում է թերթը:
ԱՄՆ նախագահը Երուսաղեմն Իսրայելի մայրաքաղաք ճանաչելու մասին հայտարարել է դեկտեմբերի 6-ին։ Ավելին` ամերիկացի առաջնորդը հայտարարել է նաև, որ ԱՄՆ դեսպանատունը Թել Ավիվից Երուսաղեմ է տեղափոխվելու։ Պաղեստինցիները թշնամաբար են ընդունել Թրամփի որոշումը, նրանց առաջնորդ Մահմուդ Աբասը հայտարարել է, որ Ամերիկայի նախագահի որոշումը հավասարազոր է խաղաղ բանակցություններում միջնորդի դերից հրաժարվելուն։
