Դավիթն ու Աստղիկը, միևնույն է, «սուպեր» են, կարծում են «Ты супер, танцы!» նախագծի երկրպագուները։
Նախագծի եզրափակիչ փուլ անցնելու համար նրանք նոր պար էին բեմադրել։ Աստղիկը ներկայացել էր հարուստ հնդկուհու, իսկ Դավիթն` աղքատ տղայի կերպարով։ Նրանք երկար ժամանակ պարապել էին` յուրացնելու համար հնդկական պարի տեխնիկան։
Ելույթից հետո նրանք ասացին` մենք շարունակելու ենք պարել ամբողջ կյանքում, քանի որ սա պարզապես պար չէ, այլ կյանք։
«Ես միշտ պարելու եմ, այս անգամ չստացվեց հաղթել, մյուս անգամ կփորձենք, և կարծում եմ` ամեն ինչ լավ կլինի»,- ասաց Դավիթը։
«Ты супер, танцы!» նախագծին մասնակցած Դավիթը 17 տարեկան է, Աստղիկը` 16։ Աստղիկը դեռ դպրոց է հաճախում, քանի որ 7 տարեկանում է դպրոց ընդունվել, իսկ Դավիթը սկսել է դպրոց հաճախել վեց տարեկանից: Այս տարի նա ընդունվել է Գյումրու գեղարվեստական ակադեմիայի թատերական արվեստի բաժին: Մանկատուն է եկել առաջին դասարանում, իսկ Աստղիկը «Թռչունյան տուն» կրթահամալիր-մանկատանն է հայտնվել հինգ տարի առաջ:
«Ты супер! Танцы» միջազգային մրցույթը, որն անցկացնում են ՆՏՎ հեռուստաընկերությունը և Sputnik գործակալությունն ու ռադիոն, միավորել է Ռուսաստանի, ԱՊՀ-ի ու Բալթյան երկրների տարբեր անկյուններում բնակվող տաղանդավոր երեխաներին և նրանց նվիրական երազանքներն իրականացնելու հնարավորություն է տվել։
«Ты супер! Танцы» միջազգային մրցույթի պրեմիերան կայացել է սեպտեմբերի 2-ին։ Նախագծին մասնակցում են ավելի քան 140 պատանի պարող 10 երկրից։