ԵՐԵՎԱՆ, 10 դեկտեմբերի – Sputnik. Ռուսաստանի ժողովրդական տնտեսության և պետական ծառայության ակադեմիայի ուսանողին, որին ստիպել են ներողություն խնդրել տեսախցիկի առաջ, կասկածում են ազգամիջյան գժտություն հրահրելու մեջ, իսկ նա պետք է դիմի ոստիկանություն։ Այդ մասին ՌԻԱ Նովոստիին հայտարարել է Ռուսական ուսանողական միության նախագահ Վասիլի Միխայլովը։
«Լիազոր մարմինները պետք է ստուգեն ուսանողի խոսքերը՝ միջկրոնական կամ ազգամիջյան թշնամանք հրահրելու առկայության վերաբերյալ, իսկ ուսանողը պետք է ոչ թե դեկանատ դիմի, այլ ոստիկանություն», — ասել է Միխայլովը։
Ավելի վաղ «Գովորիտ Մոսկվա» ռադիոկայանը հաղորդել էր, որ Ռուսաստանի ժողովրդական տնտեսության և պետական ծառայության ակադեմիայի ոլորտային մենեջմենթի ինստիտուտի ուսանող Ալեքսեյ Կնյազևին ուժով ստիպել են ներողություն խնդրել տեսախցիկի առաջ՝ սոցիալական ցանցերում տղամարդկանց հետ մահմեդական աղջիկների հարաբերությունների մասին մեկնաբանությունների համար։ Հոլովակը, որը նկարել են նրանից նեղացածները, դեկտեմբերին 9-ին հրապարակվել է Վկոնտակտե սոցցանցում և հավաքել ավելի քան 700 հազար դիտում։
Կնյազևը բանավեճի մեջ է մտել գրառման տակ, որում քննարկվել է այն հարցը, թե ինչու կովկասյան աղջիկները չեն կարող հանդիպել ռուս տղաների հետ։ Կնյազևի մեկնաբանությունները բանավեճի մասնակիցներն ընդունել են որպես վիրավորանք։
Դատելով կադրերից՝ այնուհետև Կնյազևին ստիպել են ներողություն խնդրել մահմեդականներից, քրիստոնյաներից, ակադեմիայից, ինչպես նաև բոլոր կովկասցի աղջիկներից։
