ԵՐԵՎԱՆ, 11 դեկտեմբերի — Sputnik. Իրանի Լորեստան գավառի Օշթորանքուհ լեռան վրա տեղի ունեցած ձնահոսքի հետևանքով միանգամից ինը լեռնագնաց է մահացել, Sputnik Արմենիային հայտնեց Ալպինիզմի և լեռնային տուրիզմի հայկական ֆեդերացիայի փոխնախագահ Սուրեն Դանիելյանը։
Այդ կապակցությամբ հայ լեռնագնացները հեռագիր են ուղարկել Իրանի Իսլամական Հանրապետության ալպինիզմի և սպորտային մագլցման ֆեդերացիային։
«Մշտապես լինելով Իրանի Իսլամական Հանրապետության ալպինիզմի և սպորտային մագլցման ֆեդերացիայի և լեռնագնացների բարեկամ` այդ անդառնալի կորստի կապակցությամբ ցավակցում ենք Ձեզ, զոհվածների ընտանիքի անդամներին և հարազատներին», — նշել են հայ ալպինիստները։
Նախօրեին 14 լեռնագնաց իրանական Մեշհեդ քաղաքից բարձրացել են Օշթորանքուհ լեռ։ Աղետի հետևանքով ինը լեռնագնաց ձնահոսքի տակ է մնացել։
Որոնման աշխատանքներին մասնակցում են երկու ուղղաթիռ ու 20 փրկարար։ Սակայն եղանակային պայմանների պատճառով որոնման աշխատանքները դադարեցվել են։
Իրանական ԶԼՄ-ների տվյալների համաձայն` բոլոր լեռնագնացները մահացել են, նրանց շարքում իրանցի հայտնի մարզիկներ կային։
Օշթորանքուհ լեռը գտնվում է Իրանի արևելքում ու հայտնի է Իրանական Ալպեր անվանումով։ Լեռան բարձրությունը 4150 մետր է։
