ԵՐԵՎԱՆ, 13 դեկտեմբերի — Sputnik. Ռոսպոտրեբնադզոռը (Ռուսաստանի սպառողների շահերի պաշտպանությամբ զբաղվող ծառայություն) հայտարարել է բրնձի շուկայում ուսումնասիրություն սկսելու մասին։
Պաշտոնական հաղորդագրության մեջ ասված է, որ ծառայությունը հսկիչ գնումներ է իրականացնելու ՌԴ այն տարածքներում, որտեղից ստացվել են կասկածելի որակի բրնձի առկայության մասին լուրեր։
«Սոցիալական կայքերում տեղեկություններ ու տեսագրություններ են տարածվում բրնձի մասին, որն, իբր ստացվել է պլաստիկից, և որը վաճառակետերում վաճառվում է սովորական բրնձի անվան տակ»,– ասված է ծառայության հաղորդագրության մեջ։
Իսկ մինչ պետական կառույցը կճշտի պլաստիկե բրնձի մասին լուրերի իսկությունը, կոչ է անում սպառողներին չվստահել պատահական լուրերին և կասկածներ ունենալու դեպքում դիմել իրենց։
Հիշեցնենք` Հայաստանում օրեր առաջ ևս ահազանգեր հայտնվեցին գարշահոտ ու անորակ բրնձի վաճառքի մասին։ Կասկածներ հայտնվեցին նաև դրա` արհեստական լինելու մասին։
Հայաստանի սննդի անվտանգության պետական ծառայությունն արդեն մի քանի օր է, ինչ բրնձի փորձաքննություն է իրականացնում։ Արդյունքների մասին առայժմ չի հայտարարվել։
