ԵՐԵՎԱՆ, 14 դեկտեմբերի — Sputnik. Ռուսաստանը պետք է ուղղված լինի ապագային` քաղաքական ու տնտեսական ճկուն համակարգով, որը հիմքը կլինեն բարձր տեխնոլոգիաները։ Այս մասին հայտարարել է Ռուսաստանի Դաշնության նախագահ Վլադիմիր Պուտինը։
Նա հիշեցրել է, որ բազմաթիվ անգամ պատասխանել է «ինչպիսին է տեսնում երկրի ապագան» հարցին, բայց պատրաստ է կրկնել ասածը։ Ըստ նրա` Ռուսաստանը լինելու է ժամանակակից, քաղաքական ճկուն համակարգով, աշխատանքի աճող արտադրողականությամբ երկիր։
Պուտինն ընդգծել է, որ պետք է ուշադրությունը կենտրոնացնել ենթակառուցվածքների զարգացման, կրթության, առողջապահության և բարձր տեխնոլոգիաների զարգացման ուղղությամբ։ Ամեն ինչ պետք է ուղղված լինի քաղաքացների եկամուտների մեծացմանը։
Նախագահը չի ներկայացրել նախընտրական ծրագիրը, սակայն նշել է, որ այն արդեն կա։
«Իմ ծրագրի մասին ես չեմ խոսի, բայց այն արդեն գրեթե պատրաստ է, պարզապես այժմ ներկայացնելը հարմար չէ»,- ասել է Պուտինը։
Լրագրողները հաշվել են, որ Վլադիմիր Պուտինի անցկացրած նմանատիպ 12 մամուլի ասուլիսների ընդհանուր տևողությունը երկու օր է կազմել։
