ԵՐԵՎԱՆ, 14 դեկտեմբերի — Sputnik. «Ելք» խմբակցությունը քիչ առաջ տեղի ունեցած նիստում որոշեց ՀՀ նախագահի թեկնածու առաջադրել ԱԺ պատգամավոր, «Հանրապետություն» կուսակցության քաղխորհրդի անդամ Արտակ Զեյնալյանին։ Այս մասին ֆեյսբուքյան իր էջում հայտնում է խմբակցության նախագահ Նիկոլ Փաշինյանը։
«ԵԼՔ-ը բանակցություններ կսկսի «Ծառուկյան» դաշինքի հետ՝ Զեյնալյանի առաջադրման համար անհրաժեշտ՝ պատգամավորների ¼-ի ստորագրություններն ապահովելու համար»,- գրում է Փաշինյանը։
ՀՀ 4-րդ նախագահի ընտրությունները նախանշված են 2018 թ.-ի մարտի 1-10-ն ընկած ժամանակահատվածում։
ՀՀ նոր Սահմանադրության համաձայն` Հայաստանում առաջին անգամ նախագահին կընտրեն ոչ թե ՀՀ քաղաքացիները` ուղղակի ընտրությամբ, այլ ՀՀ ազգային ժողովը։
Նախագահ կարող է ընտրվել քառասուն տարին լրացած, վերջին վեց տարում միայն Հայաստանի քաղաքացի հանդիսացող, վերջին վեց տարում մշտապես Հայաստանում բնակվող, ընտրական իրավունք ունեցող և հայերենին տիրապետող անձը։
Սերժ Սարգսյանն այդ պաշտոնին առաջադրվել չի կարող, քանի որ Սահմանադրությամբ, նույն անձը կարող է ընտրվել միայն մեկ անգամ։
