ԵՐԵՎԱՆ, 15 դեկտեմբերի — Sputnik. Ժոզե Մոուրինյոն պատրաստ է ամռանը հրաժարվել Հենրիխ Մխիթարյանից և նրա փոխարեն պայմանագիր կնքել Մեսութ Օզիլի հետ։ Այս մասին գրում է բրիտանական The Mirror-ը։
Պարբերականի տվյալով, պորտուգալացի մարզիչը կենտրոնացել է Օզիլի ուղղությամբ, քանի որ խաղաշրջանից հետո ավարտվում է ֆուտբոլիստի ու «Արսենալի» միջև կնքված պայմանագրի ժամկետը։
«Սակայն Մոուրինյոն հասկանում է, որ Օզիլի գալուց առաջ նա պետք է կրճատի իր թիմը»,- նշված է հոդվածում։
Պարբերականը հիշեցնում է նաև, որ Մոուրինյոն արդեն քննադատել է Մխիթարյանին խաղադաշտում ոչ բավարար ակտիվություն դրսևորելու համար, այնուհետև հայտարարել է, որ նրա համար տեղ չկա անգամ պահեստայինների նստարանին։
29 տարեկան Մեսութ Օզիլն ազգությամբ թուրք է։ The Mirror-ը նշում է, որ նա այնքան վստահ է «կարմիր սատանաների» թիմում հայտնվելու հարցում, որ արդեն հասցրել է աջուձախ պարծենալ դրանով։
