ԵՐԵՎԱՆ, 19 դեկտեմբերի — Sputnik. Վիտալինա Ցիմբալյուկ-Ռոմանովսկայայի բնակարանում անօրինական խուզարկություն իրականացնելու և փաստաթղթեր առգրավելու բողոքի վերաբերյալ նիստը, որ պետք է տեղի ունենար դեկտեմբերի 18-ին Մոսկվայի քաղաքային դատարանում, երեք օրով հետաձգվեց։ Այս մասին հայտնում է «Կոմսոմոլսկայա պրավդան»։
Ջիգարխանյանի նախկին կնոջ դեմ քրեական գործ է հարուցվել ՌԴ ՔՕ 137-րդ հոդվածով։ Վիտալինային մեղադրում են անձնական կյանքի գաղտնիությունը խախտելու մեջ։ Քննիչները կարծում են, որ նա ժողովրդական դերասանին նկարահանել է թաքնված տեսախցիկով, երբ նրանք դեռ ամուսնացած են եղել, իսկ հետո այդ տեսանյութերը տարածել է ԶԼՄ-ներում։
«Լրագրողները եկել էին դատարան։ Այդ ժամանակ էլ պարզվեց, որ Վիտալինայի ներկայացուցիչները Ջիգարխանյանի անձնական կյանքի մասին տեղեկությունները չբացահայտելու վերաբերյալ գրություն ունեն։ Մամուլի ներկայությունը խախտում է գաղտնիությունը», — գրում է պարբերականը։
Արդյունքում նիստի օրը տեղափոխվեց դեկտեմբերի 20-ին։ Բայց պարզ չէ` բաց կլինի ԶԼՄ-ների ներկայացուցիչների համար, թե կանցնի գաղտնիության քողի ներքո։
«Գործի բոլոր նյութերը կապված են դերասանի և նրա կնոջ մասնավոր կյանքի հետ։ Այդ պատճառով մենք պարտավոր ենք համոզված լինել, որ դերասանը դեմ չէ այդ տեղեկությունների հրապարակմանը», — լրագրողներին է ասել Վիտալինայի փաստաբան Լարիսա Շիրոկովան։
82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։
Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։
Հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։
