ԵՐԵՎԱՆ, 20 դեկտեմբերի — Sputnik. Հայաստանցիները Նոր տարին դիմավորելու համար նախընտրում են ավելի մատչելի ուղղությունները, հիմնականում` Վրաստանն ու Եգիպտոսը։ Sputnik Արմենիային ասաց տուրիստական ընկերություններից մեկի տնօրեն Ռիմա Խաչատրյանը։
Նա նախորդ տարիների համեմատ տուրիստական փաթեթների գնային փոփոխություն չի նկատել։
Ինչ վերաբերում է հայաստանյան հանգստավայրերում Ամանորը դիմավորելուն, Խաչատրյանի խոսքով, դրանք սկսում են մեկ անձի համար 130-150 հազար դրամից։ «Դրա մեջ ներառված է մեկշաբաթյա հանգիստն ու Ամանորի տոնական երեկոն, շոու ծրագիրը»,- ասաց նա։
«Այս փաթեթներից հիմնականում օգտվում են Հայաստանի պետական ծառայողները, որոնք իրավունք չունեն արտերկիր մեկնելու և ավելի շատ մնում են Հայաստանում, օգտվում են մեր երկրի հանգստյան տներից։ Իսկ այն քաղաքացիները, որոնք գումար ունեն և ապահովված են գումարով, գերադասում են հանգստանալ արտերկրում»,- ասաց Խաչատրյանը։
Այդուհանդերձ, արտերկրից ևս Ամանորին Հայաստան ժամանողներ կան։ Մեր զրուցակցի դիտարկմամբ, նրանք, ովքեր այլ երկրներում արդեն եղել են, ցանկանում են մեկ անգամ էլ Հայաստանը տեսնել։
Ի դեպ, նշենք, որ Ամանորը հայաստանյան որևէ հյուրանոցում անցկացնելը, համաձայն հյուրանոցների պաշտոնական կայքերում հրապարակված հայտարարությունների, Ծաղկաձորի, Դիլիջանի, Ջերմուկի, Սևանի ոչ թանկ հյուրանոցներում դեկտեմբերի 31-ից հունվարի 7-ը ընկած ժամանակահատվածում 1 անձի համար արժե 100-400 հազար դրամ։ Այս արժեքի մեջ ներառված են 3-անգամյա սնունդն ու Ամանորի շոու ծրագիրը։ Ավելի հայտնի, բրենդային հյուրանոցներում նույն ծառայություններն արժեն մինչև 1.5 մլն դրամ։
