ԵՐԵՎԱՆ, 20 դեկտեմբերի — Sputnik. Պետք է զգալի աշխատանք կատարել, որպեսզի ՀՀ-ԵՄ համաձայնագիրն իրականացվի։ Այսօր լրագրողների հետ ճեպազրույցի ընթացքում ասաց ԵՄ-Հայաստան ԽՀՀ համանախագահ Սաջադ Քարիմը։
Կարևորելով փաստաթուղթը` Սաջադ Քարիմը նշեց, որ այն մեծ նվաճում է, և հետևողական աշխատանքի դեպքում հնարավոր կլինի ընդլայնել ու խորացնել երկկողմ հարաբերությունները։
«Այս խորհրդարանը պետք է դեռ զգալի աշխատանք կատարի, որպեսզի համաձայնագիրը և կատարվելիք աշխատանքը իրականացվի։ Այն ներառում է շատ լավ հիմք ֆինանսական օժանդակության ցուցաբերման համար։ Մենք ավանդաբար «ավելին ավելիի» դիմաց սկզբունքով ենք աշխատել, որն իր հետ պայմաններ է բերում։ Հայաստանն այդ առումով պետք է ցույց տա, որ մեր կողմից նախանշված ոլորտներում ինքն առաջընթաց ունի», — ասաց եվրոպացի պաշտոնյան` ավելացնելով, որ Բրյուսելում ստորագրված համաձայնագրիը կվավերացվի, երբ անցնի ԵՄ անդամ պետությունների խորհրդարանների ընթացակարգերով։
Եվրոպան անլեգալ ապրող ավելի շատ հայերի հայրենիք կվերադարձնի. Եգանյան
«Այն պետք է ԵՄ բոլոր 28 խորհրդարանների ներքին խորհրդարանական ընթացակարգերն անցնի, հետո գա ԵԽ՝ վավերացման։ Որևէ անդամ պետության կողմից մենք չենք ակնկալում որևէ դժվարություն։ Հենց այդ գործընթացն ավարտվի, փաստաթուղթը կգա Եվրոպական խորհրդարան, ու շատ սահուն կերպով կվավերացվի», — նշեց Սաջադ Քարիմը։
