ԵՐԵՎԱՆ, 20 դեկտեմբերի — Sputnik. ՄԱԿ–ի տնտեսական և սոցիալական հարցերով բաժինն ընդհանրացնող հաշվետվություն է կազմել ամբողջ աշխարհում միգրանտների թվի մասին։
Հաշվետվության համաձայն` այսօրվա դրությամբ Հայաստանում բնակվում է 191 հազար միգրանտ։ Այդ թիվը կազմում է հանրապետության ընդհանուր բնակչության 6,5 տոկոսը։ Միաժամանակ, միգրանտների շարքում ավելի շատ կանայք կան, քան տղամարդիկ։
Նրանց տվյալների համաձայն` դարասկզբի համեմատ իրավիճակը զգալիորեն փոխվել է։ 2000թ–ի հաշվետվության համաձայն` Հայաստանում միգրանտների թիվը կազմել է 658 հազար (բնակչության 21 տոկոսը)։
Սակայն ՄԱԿ հաշվետվությունը հաշվի չի առնում միգրանտների ազգությունը։ Այսպիսով, Հայաստանում բնակվող Ռուսաստանի քաղաքացի հայերը համարվում են միգրանտներ։ Երևի հենց դրանով կարելի է բացատրել այս ֆանտաստիկ թվերը։
Ինչ վերաբերում է Հայաստանի հարևաններին, ապա Վրաստանի տարածքում բնակվում է 78 հազար միգրանտ, ինչը կազմում է երկրի բնակչության թվի 2 տոկոսը։ Իսկ Ադրբեջանում` 259 հազար միգրանտներ, ինչը 70 հազարով քիչ է, քան 2000թ–ին։ Թուրքիայում միգրանտների թիվը կազմում է շուրջ 5 միլիոն, իսկ 17 տարի առաջ նրանց թիվը կազմել է 1,3 միլիոն։
Շուրջ 258 մլն մարդ կամ աշխարհի բնակչության 3,4 տոկոսը հեռացել է այն երկրներից, որտեղ ծնվել է և բնակվում է այլ պետություններում` դառնալով միջազգային միգրանտ։ Նրանց թիվը 2000թ–ից աճել է 49 տոկոսով։ Մարդիկ ամենաշատ են հեռանում Հնդկաստանից, Մեքսիկայից, Չինաստանից, Սիրիայից, Պակիստանից և Ուկրաինայից։
