ԵՐԵՎԱՆ, 20 դեկտեմբերի — Sputnik. Ստավրոպոլում դեկտեմբերի 19–ի լույս 20–ի գիշերը պայթյուն է որոտացել, պայթյունից հետո տարհանվել է ավելի քան 100 մարդ, ՌԻԱ Նովոստիին հաղորդել են քաղաքապետարանից։
Քաղաքագլուխ Անդրեյ Ջատդոևի խոսքով` պայթյունը տեղի է ունեցել ոչ թե կենցաղային գազի արտահոսքի պատճառով, այլ «անօրինական գործողությունների», որոնց էությունը պաշտոնյան չի բացահայտել։ Միաժամանակ նա հավելել է, որ պատահարը տեղի է ունեցել այդ շենքում բնակարան վարձած բնակչի մեղքով։
Ականատեսները պնդում են, որ միջադեպը տեղի է ունեցել 10–րդ հարկում։ Բնակարանում գտնվել է տղամարդ, որը սպառնացել է կրկնել պայթյունը։
Միաժամանակ, իրավապահ մարմիններին աղբյուրը պարզաբանել է, որ բարձրահարկ շենքում պայթել է ՌԳԴ–5 նռնակ։ Քաղաքի հերթապահ–դիսպետչերական ծառայությունից ՌԻԱ Նովոստիին հաղորդել են, որ պայթյունի հետևանքով տուժածներ չկան։
Ստավրոպոլի Արդյունաբերական շրջանի վարչակազմի ղեկավար Դմիտրի Սեմյոնովը հաստատել է, որ ենթադրվող հանցագործը չեզոքացվել է։
Սեմյոնովը հաղորդել է նաև, որ բնակարանը, որտեղ բնակվել է կասկածյալը, խուզարկել են։ Նրա խոսքով` քննիչներն ավարտել են աշխատանքը և բնակիչներին թույլ են տվել վերադառնալ շենք։