ԵՐԵՎԱՆ, 20 դեկտեմբերի — Sputnik. Հանրահայտ դերասան Արմեն Ջիգարխանյանը չեղարկել է նախկին կնոջ` Վիտալինա Ցիմբալյուկ-Ռոմանովսկայայի անունով կտակը։ «Կոմսոմոլսկայա պրավդա» պարբերականին այս մասին հայտնել է դերասանի ընկեր Արթուր Սողոմոնյանը։
«Արմեն Բորիսովիչը նոր կտակ կազմելու նպատակ չունի, հատկապես, որ նա այլևս ոչինչ չունի։ Բոլոր բնակարանները գրանցված են Վիտալինայի անունով, և նա փողերը հանել է Ջիգարխանյանի հաշվեհամարից։ Բանկում մոտավորապես 6-7 հազար ռուբլի է մնացել։ Բայց մենք հույս ունենք վերադարձնել այն, ինչ վերցրել են խարդախության միջոցով»,- ասել է Սողոմոնյանը։
Մոսկվայի քաղաքային դատարանում դեկտեմբերի 20-ին քննվել է Արմեն Ջիգարխանյանի նախկին կնոջ տանը խուզարկություն անցկացնելու օրինականության մասին բողոքը։ Վիտալինայի փաստաբանները բողոքել են քննիչ Միզոնովի գործողություններից։
«Այժմ իրավապահ մարմինները ստուգում են փաստերը, և մենք սպասում ենք արդյունքներին»,- ասել է Սողոմոնյանը։
Վիտալինան իր ամուսնուն փախցնելու մեջ մեղադրում է հենց Սողոմոնյանին։ Ջիգարխանյանի կողմը մի քանի հայտարարություն է ներկայացրել, որոնցում Վիտալինային մեղադրում է հերյուրյանքի ու կեղծ մատնության մեջ։
«Նա հայտարարեց, որ ես եմ փախցրել Ջիգարխանյանին։ Այդպիսի հայտարարությունները կատակ չեն։ Մարդ փախցնելու համար 6-14 տարվա ազատազրկում է սպառնում»,- ասել է Ջիգարխանյանի ընկերը` ավելացնելով, որ դրան հաջորդել են թատրոնը գրավելու մեղադրանքները։
Ավելի վաղ հայտնի էր դարձել, որ Ցիմբալյուկ-Ռոմանովսկայային պաշտոնական մեղադրանք է առաջադրվել ՌԴ ՔՕ 137-րդ հոդվածով (անձնական կյանքի անձեռնմխելիության խախտում)։ Դաշնակահարուհին ամուսնու անձնական և ընտանեկան կյանքի մասին տեղեկություններ է հավաքել և ԶԼՄ-ներում տարածել առանց Ջիգարխանյանի համաձայնության։
82-ամյա դերասան Արմեն Ջիգարխանյանի և նրա 38-ամյա կնոջ` Վիտալինա Ցիմբալյուկ-Ռոմանովսկայայի մասին սկսեցին խոսել հոկտեմբերի առաջին տասնօրյակում, երբ դերասանը հայտնվեց հիվանդանոցում և հայտարարեց, որ պատրաստ չէ ներել իրեն ցավ պատճառած կնոջը։
Ավելի վաղ Ցիմբալյուկ-Ռոմանովսկայան, որ Ջիգարխանյանի ղեկավարած թատրոնում տնօրենի պաշտոն էր զբաղեցնում, սեփական ցանկությամբ հեռացել էր թատրոնից և հայտարարել, որ ցանկանում է ամուսնալուծվել։
Դրանից հետո Ջիգարխանյանը պաշտոնական նամակ էր ուղղել Մոսկվայի մշակույթի դեպարտամենտ` իրեն և թատրոնի արտիստներին «կոլեկտիվի նորմալ աշխատանքին խանգարող խաբեբաներից» պաշտպանելու խնդրանքով։
Հոկտեմբերի վերջին Արմեն Ջիգարխանյանի ղեկավարած թատրոնում հետաքննչական գործողություններ անցկացվեցին դերասանի կորցրած անձնագրի վերաբերյալ քրեական գործով։ Տեղեկացվեց նաև, որ խուզարկություն է անցկացվել Ցիմբալյուկ-Ռոմանովսկայայի բնակարանում, առգրավվել են արտասահմանյան անձնագիրը, բժշկական փաստաթղթերն ու Ջիգարխանյանի կտակը։
