ԵՐԵՎԱՆ, 26 դեկտեմբերի — Sputnik. Պլաստմասսե տարաները մամլելու են ու մայթի սալիկներ են պատրաստելու։ Կապանի քաղաքապետ Աշոտ Հայրապետյանը Sputnik Արմենիայի թղթակցի հետ զրույցում հայտնեց, որ արտադրությունը մեկնարկելու է 2018 թվականին։
Կապանի քաղաքապետարանը թափոնները հավաքելու է ինչպես Կապանում, այնպես էլ Հայաստանի հարավային այլ քաղաքներում` Սյունիքի ու Վայոց ձորի մարզերում։ Լիմոնադի շշերը, թթվասերի տարաները, տոպրակները հավաքելու են, մամլելու, իսկ հետո Կապան են տանելու, որտեղ մաքրելու են ու սալիկների վերածելու։
Եվրամիության ծրագրի շրջանակում քաղաքապետարանն արդեն մի փոքր արտադրամաս է զինել ու պլաստիկի մամլիչներ ստացել, որոնք նաև այլ քաղաքների է բաժանել։ Արտադրության մեջ մոտ 35 մարդ է զբաղված լինելու։
«Հիմա ամեն անգամ, երբ մայթը նորոգելու կարիք ունենանք, ստիպված չենք լինի սալիկ գնել։ Ինքներս կանենք։ Ու ոչ միայն մեզ համար, այլ նաև մյուս քաղաքների», — ասաց Կապանի քաղաքապետը։
Անցած տարիների ընթացքում քաղաքապետարանը պահեստում մի քանի տոննա պլաստիկ է հավաքել, որը պետք կգա նախնական շրջանում ։ Յուրաքանչյուր տարի ևս մի քանի տոննա է հավաքելու` աղբից ազատելով խոտը, ծաղիկներն ու ծառերի ճյուղերը։
