2017թ-ի ամենակարևոր քաղաքական իրադարձությունը, քաղտեխնոլոգ Վիգեն Հակոբյանի դիտարկմամբ, ապրիլին կայացած խորհրդարանական ընտրություններն էին։
«Այս ընտրությունները կարևոր էին նրանով, որ հետագայում առաջնային մանդատով նախանշված ընտրությունները կայանալու են միայն 2022թ-ին։ Այսինքն` մենք ընտրել ենք այն, ինչ ընտրել ենք, և հիմա 5 տարվա ընթացքում, իշխանությունը տալով այս քաղաքական մեծամասնությանը, պետք է տեսնենք, թե դա ինչի է բերում»,-ասում է Հակոբյանը։
Այդուհանդերձ, խորհրդարանը, Հակոբյանի գնահատմամբ, առայժմ պատրաստ չէ նոր Սահմանադրությամբ իրեն վերապահված դերակատարությունը ստանձնելուն և «իներցիայով շարունակում է նայել, թե ինչ կբերեն նախագահականից և կառավարությունից»։
Չնայած դրան, քաղաքական ուժերը հասկանալով իրենց վրա դրված նոր պատասխանատվությունը` ընտրություններին մասնակցել են ֆիլտրված ցուցակներով։ Վիգեն Հակոբյանը փաստում է, որ ընտրական ցուցակների առաջին տասնյակում գոնե ներգրավվել էին առավել ներկայանալի դեմքեր։
