Խաչիկ Չախոյան, Sputnik.
Նման պայմաններում մեր հավաքականի համար հույժ կարևոր է կազմի ընտրությունը: Հավաքականի փորձառու յուրաքանչյուր ֆուտբոլիստ պարզապես շատ մեծ դերակատարում կարող է ունենալ մեր ընտրանու համար Ազգերի լիգայի մրցաշարում: Հավաքականին, անկասկած, շատ է հարկավոր կիսապաշտպան Գևորգ Ղազարյանը, ով երկար ժամանակ բացակայում էր վնասվածքի պատճառով:
Ֆուտբոլի Հայաստանի ազգային հավաքականի կիսապաշտպան Գևորգ Ղազարյանը 2017 թվականի մարտի 26-ին Հայաստան-Ղազախստան խաղի ժամանակ ծանր վնասվածք ստացավ ու երկար ժամանակ ապաքինվում էր: Գևորգ Ղազարյանը Sputnik Արմենիայի հետ զրույցում պատմել է իր ապաքինման և նպատակների մասին։
Տարեվերջին Ղազարյանն արդեն աստիճանաբար սկսեց մասնակցել իր թիմի՝ «Մարիտիմույի», ընդհանուր մարզումներին, իսկ ձմեռային ընդմիջման գնալուց առաջ մասնակցեց երկու հանդիպումների. «Հիմա արդեն նորմալ վիճակում եմ: Պարզապես, երկարաժամկետ բացակայությունից հետո ունեցա նաև փոքրիկ վնասվածքներ: Ֆուտբոլին մոտ կանգնած մարդիկ շատ լավ գիտեն, որ երկար ժամանակ ապաքինվելուց հետո նման վնասվածքներ բոլորի հետ էլ պատահում են»- նշեց Ղազարյանը:
Հայաստանի հավաքականի կիսապաշտպանը լավ հասկանում է, որ Ազգերի լիգայի խաղարկությունը շատ լավ շանս է Եվրոպայի առաջնությունում հայտնվելու համար.«Կարծում եմ ազգային հավաքականի բոլոր թեկնածուները պետք է հավաքական ներկայանան լավ մարզավիճակով ու խաղան մեծ նվիրվածությամբ ու բարձր մոտիվացիայով»,–ասում է նա:
Ադրբեջանի հավաքականի գլխավոր մարզիչը նշել էր, որ չէր ցանկանա խաղալ Հայաստանի հավաքականի դեմ: Հայաստանի հավաքականի կիսապաշտպանը լրիվ այլ կարծիքի է.«Ես չեմ ուզում քաղաքականացնել ֆուտբոլը: Մեր գործը ֆուտբոլ խաղալն է և ես ու կարծում եմ նաև թիմակիցներս պատրաստ ենք լինելու խաղալ յուրաքանչյուր մրցակցի դեմ»:
Բնականաբար, Գևորգ Ղազարյանին էլ չի կարող չանհանգստացնել Հենրիխ Մխիթարյանի ֆուտբոլային ճակատագիրը: Տարածվող լուրերին ծանոթ լինելով հանդերձ` Ազգային հավաքականի ավագին թիմակիցը ցանկանում է տեսնել Մանչեսթերում. «Կուզեի, որ Հենրիխը, վերջապես, մաքսիմում խաղաժամանակ ստանար «Մանչեսթեր Յունայթեդում» ու նոր տիտղոսներ նվաճեր այս թիմի հետ»:
Գևորգ Ղազարյանը վստահ է, որ մենք տաղանդավոր ֆուտբոլիստներ ունենք դրսում, ովքեր շատ աշխատելու դեպքում կարող են խաղալ և՛ տարբեր լիգաներում և՛, իհարկե, ազգային հավաքականում:
