ԵՐԵՎԱՆ, 6 հունվարի — Sputnik. Երևանի խոշորագույն ավտոշուկայում հունվարի 7-ին բողոքի ցույց է անցկացվելու աջ ղեկով ավտոմեքենաներն արգելելու համար: Հավաքը կազմակերպվելու է Երևանի հարավային ծայրամասում` Էրեբունու ավտոշուկայի մերձակայքում: Այս մասին գրված է «Աջ ղեկ» նախաձեռնության ֆեյսբուքյան էջում:
Արգելքը գնալով ավելի հստակ եզրագծեր է ստանում: Դեկտեմբերի 27-ին նախաձեռնության ակտիվիստները հրապարակել էին տրանսպորտի, կապի և ՏՏ նախարար Վահան Մարտիրոսյանի պատասխանը` պատգամավոր, «Ելք» ընդդիմադիր խմբակցության քարտուղար Գևորգ Գորգիսյանի հարցմանը:
Պատասխանի մեջ նշվում է, որ մինչև 2018 թվականի ապրիլի 1-ը ներկրված աջակողմյան ղեկային տեղաբաշխմամբ տրանսպորտային միջոցները կարող են շահագործվել, իսկ 2018 թվականի ապրիլի 1-ից հետո այդ ավտոմեքենաների հաշվառում չի իրականացվելու։ Տրանսպորտային միջոցների սեփականատերերի փոփոխություն կարող է իրականացվել միայն ՀՀ ոստիկանության թույլտվության համաձայն աջակողմյան ղեկային տեղաբաշխման տրանսպորտային միջոցների վերասարքավորումից հետո։
Ո՞վ ղեկը փոխելու իրավունք ունի, և ո՞վ է դրանից հետո պատասխան տալու անվտանգության համար, չի նշվում:
Ցույցին ցանկանում են միանալ ոչ միայն ավտոմեքենաների սեփականատերերը, այլև վաճառողները: Հավաքն ուզում են վերածել ավտոերթի, հայտնեց «Ավտովարորդների պաշտպանության լիգա» ՀԿ-ի նախագահ Տիգրան Հովհաննիսյանը:
«Կիրակի առավոտից կհավաքվենք շուկայում, կտեսնենք` ով կկարողանա դուրս գալ ավտոմեքենայով: Կշրջենք քաղաքով, բայց ոչ հենց այնպես: Գուցե հասնենք մինչև նախագահական դարպասներ», — հայտնեց Հովհաննիսյանը:
Նշենք, որ հանրապետությունում աջ ղեկով մոտավորապես 35 հազար ավտոմեքենա է գրանցված (Հայաստանի ոստիկանության տվյալներով):
Որպես կանոն, դրանք մի քանի հազար դոլարով ավելի էժան են սովորական ձախ ղեկ ունեցողներից, ինչի համար էլ զգալի պահանջարկ են վայելում: