ԵՐԵՎԱՆ, 7 հունվարի — Sputnik. Ամերիկյան ռեալիթի շոուի աստղ Քիմ Քարդաշյանը հերթական անգամ ուրախացրել է հետևորդներին՝ ընտանեկան արխիվից սև ու սպիտակ լուսանկար տեղադրելով։
Հաղորդավարուհու Instagram-ի էջում հրապարակված լուսանկարում պատկերված է ապագա հեռուստաաստղի հայրը` Ռոբերտ Քարդաշյանն ու նրա բարեկամուհի Անդրեան` Սիսիի քուրը (Քիմի ազգականը, որն արդեն ավելի քան 20 տարի է` պայքարում է քաղցկեղի դեմ․ 2013 թվականի սկզբին աստղը նույնիսկ կոչ էր արել երկրպագուներին ոսկրածուծ հանձնել նրա համար)։
Միաժամանակ հայ գեղեցկուհին նշել է, որ իր հոր ու որդու միջև նմանություն կա։
«Սեյնթը հորս ականջներից ունի»,- նշել է Քիմն իր գրառման մեջ։
Քիմ Քարդաշյանի ու հայտնի երաժիշտ Քանյե Ուեսթի որդին լույս աշխարհ է եկել 2015 թվականի դեկտեմբերի 5-ին։
Քիմը Սեյնթի նկարն առաջին անգամ հրապարակել է Instagram-ում փետրվարի 22-ին՝ իր հոր՝ հանգուցյալ Ռոբերտ Քարդաշյանի ծննդյան օրը։
Ռոբերտ Ջորջ Քարդաշյանն ամերիկահայ իրավաբան է։ Նա ներգրավված է եղել աղմկահարույց գործերում, որոնցից մեկն էլ կնոջը սպանելու մեջ մեղադրվող ֆուտբոլիստ Օ․Ջեյ Սիմփսոնի պաշտպանությունը։
1978-ից 1990 թվականներ ընկած ժամանակահատվածում Ռոբերտն ամուսնացած է եղել Քրիս Ջենների հետ։ Այդ ամուսնությունից երեք աղջիկ է ծնվել՝ Քորթնին, Քլոին ու Քիմը, նաև որդին`Ռոբերտ կրտսերը։
Ընտանիքի հայրը 59 տարեկանում մահացել է քաղցկեղից 2003 թվականի սեպտեմբերի 30-ին։
