ԵՐԵՎԱՆ, 18 հունվարի — Sputnik. Խորհրդարանական ընտրությունների հին համակարգը վերադարձնելը նպատակահարմար չէ։ Կառավարությունում այդ մասին հայտարարեց ՀՀ արդարադատության նախարար Դավիթ Հարությունյանը` ներկայացնելով «Ծառուկյան» դաշինքի երեք պատգամավորների` Նաիրա Զոհրաբյանի, Վահե Էնֆիաջյանի և Միքայել Մելքումյանի ներկայացրած օրինագծի վերաբերյալ կառավարության եզրակացությունը։
Նրանք առաջարկում էին տարածքային ցուցակները հանել ընտրական համակարգից, քանի որ դրանց միջոցով են տեղի «իշխանիկները» հասնում պատգամավորական աթոռին։ Համամասնական ցուցակներով դա անելն ավելի դժվար է։ Այդ պատճառով ընտրությունները պետք է 100% անցնեն համամասնական ցուցակով, կարծում են ծառուկյանականները։
Իրականում, նշեց Հարությունյանը, նոր համակարգի համաձայն, պատգամավորների կեսն անցնում է համամասնական ցուցակով, մյուս կեսը` տարածքային։ Համամասնական ցուցակի տեղերը բաշխում է կուսակցությունը, տարածքայինում` տեղերը բաշխվում են ըստ ընտրողների ձայների։
«Այլ կերպ ասած, բաց ցուցակներն ավելի ժողովրդավարական են։ Հակառակ դեպքում մարդը քվեարկում է կուսակցության համար և նույնիսկ չգիտի, թե ի վերջո ով է ներկայացնելու նրա շահերը խորհրդարանում», — հայտնեց Հարությունյանը։
Նշենք, որ «Ծառուկյան» դաշինքից տարածքային ցուցակներով խորհրդարան են անցել իրենց տարածքներում ազդեցիկ գործարարներ Մելիք Մանուկյանը, Վարդան Ղուկասյանը, Հրանտ Մադաթյանը, ինչպես նաև նախկին վարչապետ Հովիկ Աբրահամյանի որդին` Արգամ Աբրահամյանը։
