ԵՐԵՎԱՆ, 19 հունվարի — Sputnik. «Ելք» ընդդիմադիր դաշինքի կազմակերպած բողոքի ակցիային մոտ հազար մարդ է միացել, որոնք բողոքում են թանկացումներից։
Կազմակերպիչները խոստանում են հասնել հաղթանակի, այն է` գների իջեցման։
Սա ներքին խնդիր է, որ կապ չունի ոչ ԵԱՏՄ-ի, ոչ միջազգային գների հետ, կարծում են «Ելքի» ներկայացուցիչները։
«Հունվարի 1-ից դիզելային վառելիքի, բենզինի և եկամտահարկի բարձրացումը խորհրդարանի նախաձեռնությունն է», — հավաքվածներին ասաց պատգամավոր Էդմոն Մարուքյանը։
Նրա խոսքով` այդ թանկացումը շղթայական ռեակցիա կունենա, մանավանդ, որ Ամանորից առաջ արդեն իսկ թանկացել էին մի շարք մթերքներ։
Նա համոզված է, որ դրա հետևանքով աղքատության շեմը կաճի։
Հավաքվածները շարունակում են երթը` «իջեցում» վանկարկելով։
Երթը մեկնարկել է Շառլ Ազնավուրի հրապարակից և կավարտվի Հյուսիսային պողոտայում։
