ԵՐԵՎԱՆ, 5 փետրվարի — Sputnik, Աշոտ Սաֆարյան. Բելառուս ռազմական վերլուծաբան Ալեքսանդր Ալեսինը հանդես է եկել բավական հետաքրքիր, գրեթե սենսացիոն հայտարարությամբ։ Նա ասել է, որ Մինսկը հրաժարվել է Ադրբեջան առաքել «Պոլոնեզ» համազարկային կրակի ռեակտիվ համակարգերը։
Այս հայտարարությանը սենսացիոն բնույթ է հաղորդում այն, թե ինչպիսի ցուցադրական հանդիսավորությամբ էին ադրբեջանական պաշտոնյաները, ԶԼՄ-ները և փորձագետները խոսում «Պոլոնեզների» վաճառքի մասին` որպես արդեն գրեթե իրագործված փաստ։ Որոշ ժամանակ անց բելառուս վերլուծաբանից իմանում ենք, որ գործարքը տապալվել է։
«Մենք ուզում էինք «Պոլոնեզ» վաճառել Ադրբեջանին։ Բայց Հայաստանը` ՀԱՊԿ-ում մեր գործընկերը, դեմ էր դրան։ Գործարքը չի կայացել։ Հավանաբար «Պոլոնեզի» առաջին գնորդը կդառնա Ղազախստանը», — Ալեսինի ասածը մեջբերում է «Կոմսոմոլսկայա պրավդան»։
Ավելին` չի բացառվում, որ Բելառուսը շուտով կսկսի զենք վաճառել Հայաստանին։
Հիշեցնենք, որ դեռ անցած տարվա հոկտեմբերին Ադրբեջանի պաշտպանության նախարար Զաքիր Հասանովն աշխատանքային այցով մեկնել էր Մինսկ։ Ադրբեջանական ԶԼՄ-ները հայտնել էին, որ բելառուսական ղեկավարության հետ քննարկվել է Բաքվի կողմից տվյալ հրթիռային համալիրները ձեռք բերելու հարցը։ Չնայած նրան, որ հարցը վերաբերում է նշանակությամբ, գործառույթներով և մարտական խնդիրներով բոլորովին տարբեր միջոցների մասին, այնուհանդերձ Բաքվում ակտիվ քննարկել են այս թեման` «Պոլոնեզ» գնելը ներկայացնելով որպես հայկական բանակում առկա «Իսկանդերի» պատասխան։
Եթե Բաքուն նման ահեղ զենք ստանար, ապա կարող էր լուրջ գլխացավանք դառնալ Երևանի համար։ Գործարքը հասարակական-քաղաքական մեծ աղմուկ կբարձրացներ Հայաստանում։ Հայ հասարակությանը բարդ կլիներ բացատրել Մինսկի ոչ միանշանակ պահվածքը, որը ՀԱՊԿ-ում և ԵԱՏՄ-ում Հայաստանի դաշնակիցն է։
Բելառուս փորձագետի հայտարարությունը հաստատեց նաև Հայաստանի ՊՆ-ում Sputnik Արմենիայի աղբյուրը։ Նա առաջին հերթին նշեց այն հանգամանքը, որ «Պոլոնեզի» վաճառքը կհակասեր ՀԱՊԿ շրջանակում գործընկերային հարաբերությունների տրամաբանությանը։
Ինչպես նշեց մեր զրուցակիցը, հայկական կողմն ամենաբարձր մակարդակում ցույց է տվել, որ գործարքն անթույլատրելի է, սպառնալիքի տակ է դրվում արցախյան հակամարտության գոտում ուժերի հավասարակշռության հարցը։ Նրա խոսքով` մինչև հիմա Երևանն աչք է փակել, որ բելառուսական կողմը մեծ քանակությամբ սպառազինությունն և ռազմական տեխնիկա է մատակարարել Ադրբեջան, օգնել արդիականացնել Ադրբեջանի տրամադրության տակ եղած Սու-25 և Սու-27 գրոհիչ և կործանիչ ինքնաթիռները։
Հայ ռազմական վերլուծաբան Կարեն Վրթանեսյանի կարծիքով` առայժմ բարդ է ասել, թե ինչ է տեղի ունեցել իրականում։
«Բացառված չէ, որ գործարքն իրականում չեղյալ է հայտարարվել։ Մյուս կողմից, հնարավոր է, որ այն չի էլ ծրագրվել, եթե հաշվի առնենք, որ այդ տեղեկատվական իրարանցումը «Պոլոնեզի» շուրջ ծագել է ադրբեջանական կողմի մատուցմամբ։ Նույնիսկ բելառուսական մամուլում այդ թեմայի վերաբերյալ տեղեկությունները հրապարակել են` հղում անելով ադրբեջանական աղբյուրներին։ Այստեղ բոլոր սցենարները հնարավոր են», — նշեց Վրթանեսյանը Sputnik Արմենիայի հետ զրույցում։
«Պոլոնեզ» համակարգը նախատեսված է հակառակորդի ցանկացած խմբային կամ կետային թիրախները, կենդանի ուժը և զինտեխնիկան խոցելու համար։ Այն ներառում է մարտական հսկողության մեքենա, տրանսպորտալիցքավորող մեքենա և տարբեր նշանակության հրթիռներ` տրանսպորտագործարկման կոնտեյներներում։
Իր մարտավարատեխնիկական բնութագրերով տվյալ համազարկային կրակի ռեակտիվ համակարգերը գերազանցում են ռուսական տարբերակներին, մասնավորապես` «Սմերչերին», որոնց հեռահարությունը 90 կմ է։
