ԵՐԵՎԱՆ, 7 փետրվարի — Sputnik. Հայաստանի հավաքականի կիսապաշտպան Հենրիխ Մխիթարյանը կարող է խաղալ ցանկացած թիմում, լրագրողներին այսօր Երևանում ասել է Ֆրանսիայի կազմում Եվրոպայի և աշխարհի նախկին չեմպիոն Քրիստիան Կարամբեն։
Փետրվարի 7-ին «Ռեալ Մադրիդի» նախկին խաղացող, աշխարհի և Եվրոպայի չեմպիոն Քրիստիան Կարամբեի ուղեկցությամբ Երևան էր տեղափոխվել աշխարհի առաջնության գավաթը։
«Ուզում եմ աջակցել Հայաստանի հավաքականի ավագ Հենրիխ Մխիթարյանին, որպեսզի նա վստահություն ձեռք բերի և թիմի հետ միասին կարողանա դուրս գալ աշխարհի հաջորդ առաջնության եզրափակիչ», – ասել է Կարամբեն։
Հենրիխը տաղանդավոր է, նա լավ ֆուտբոլիստ է և կարող է խաղալ ցանկացած թիմում։
«Նա խաղացել է Բունդեսլիգայում, անգլիական Պրեմիեր լիգայում։ Նա օժտված է բոլոր այն հատկություններով, որը թույլ կտա նրան իր թիմակիցների հետ հասնել իրենց առջև դրված նպատակներին», – ասել է Կարամբեն։
Նա նշել է, որ ճանաչում է նաև Գևորգ Ղազարյանին (այժմ պորտուգալական «Մարիտիումի» հարձակվող), որը խաղացել է «Օլիմպիակոսի» կազմում։
Ֆրանսիայի հավաքականում նրա հետ խաղացող ամենաուժեղ ֆուտբոլիստները, Կարամբեի խոսքով, Զինեդին Զիդանն էր, Յուրի Ջորկաեֆն ու Թիերի Անրին։
Հիշեցնենք, որ Հենրիխ Մխիթարյանն «Արսենալ» էր տեղափոխվել հունվարի երրորդ տասնօրյակում, այդ օրվանից նա «զինագործների» կազմում երկու խաղ է անցկացրել։ Առաջին խաղում «Սուոնսիի» հետ կիսապաշտպանը փոխարինման դուրս եկավ երկրորդ խաղակեսում և գրեթե չկարողացավ օգնել թիմին, սակայն «Էվերթոնի» հետ երկրորդ խաղն իր հաղթական էր։ Մխիթարյանը խաղի ընթացքում երեք գոլային փոխանցում կատարեց և խաղաշրջանի ընթացքում փոխանցումների թվով հավասարվեց չիլիացի Ալեքսիս Սանչեսի հետ, որը «ՄՅու» էր տեղափոխվել։
